Inteko ishinga amategeko ya Leta zunze ubumwe z’Amerika, Congress, yatangaje umushinga w’ingengo y’imali y’amadolari tiriliyoni 1.2 (ni ukuvuga miliyari 1,200).
Abayigize b’amashyaka yombi, Abarepubulikani n’Abademokarate, bari bamaze iminsi barananiwe kumvikana ku buryo inzego za guverinoma yo ku rwego rw’igihugu zimwe na zimwe ziteguraga guhagarika ibikorwa byazo kuri uyu wa gatanu guhera saa sita y’ijoro (kw’isaha y’i Washington D.C.)
Muri izo nzego harimo izikomeye nka minisiteri y’ubuzima, minisiteri y’umulimo, minisiteri y’ingabo, minisiteri y’umutekano w’imbere mu guhugu, ishinzwe ibibazo by’abimukira, umutekano w’imipaka n’uw’ibibuga by’indege, cyangwa ikigega cya minisiteri y’ububanyi n’amahanga gishinzwe gutera inkunga ishami ry’Umuryango w’Abibumbuye ryita ku mpunzi z’Abanyapalestina.
Noneho impande zombi zageze ku mwanzuro. Inteko y’Abadepite iratora, yemeze, umushinga w’itegeko uyu munsi ku wa gatanu. Irahita uwushyirikiza Sena nayo iwemeze, mbere y’uko ugera ku meza y’umukuru w’igihugu kugirango awushyireho umukono, bityo ube ubaye itegeko, mbere ya saa sita y’ijoro.
Iki ni igice cya kabiri cy’ingengo y’imali y’igihugu yatangiye kw’itariki ya mbere y’ukwa cumi gushize, ikazarangira kw’itariki ya 30 y’ukwa cyenda gutaha. Congress yemeje itegeko y’igice cya mbere cyayo kw’itariki ya 8 y’uku kwezi kwa gatatu turimo.
Mu itangazo abayoboye imishyikirano ku mpande zombi, Senateri Patty Murray wo mw’ishyaka ry’Abademokarate na Senateri Susan Collins w’Umurepubulikani bashyize aahagaragara, baragira, bati: “Uyu mushinga w’itegeko wa nyuma uzashora imali mu baturage ba Leta zunze ubumwe z’Amerika, uzubaka ubukungu bukomeye, kandi uzaha ingufu umutekano w’igihugu cyacu n’ijambo, igihagararo n’icyubahiro gifite kw’isi.” (Reuters/VOA, AP)
Forum