Minisitiri w’ububanyi n’amahanga w’Ubushinwa, Wang Yi yabonanye na mugenzi we wa Ostraliya, Penny Wong, kuri uyu wa gatatu i Canberra, nk’ikimenyetso cyo gusubukura kw’umubano hagati y’ibihugu bituranyi byo ku mugabane w’Aziya bikora ku nyanja ya Pasifika.
Uruzinduko rwa Wang muri Ostraliya ni urwa mbere rw’umuyobozi wo ku rwego rwo hejuru w’Ubushinwa kuva mu mwaka wa 2017.
Nyuma y’inama bagiranye, minisitiri w’ububanyi n’amahanga wa Ostraliya Wong, yavuze ko we na Wang baganiriye ku kibazo cy’umwanditsi Yang Hengjun ufungiye mu Bushinwa kuva mu 2019. Yafunze ashinjwa ubutasi.
Urukiko rw’Ubushinwa mu kwezi kwa kabiri rwahaye Yang, igihano gisubitse cy’urupfu.
Penny Wong, minisitiri w’ububanyi n’amahanga wa Ostraliya yagize ati:
“Inama yari amahirwe kuri twembi, minisitiri w’ububanyi n’amahanga w’Ubushinwa Wang Yi nanjye ubwa njye, yo kuganira tubwizanya ukuri ku bibazo twese bitureba. Twaganiriye ku gihano cya Dogiteri Yang Hengjun. Nabwiye minisitiri w’ububanyi n’amahanga ko abanya-Ostraliya batunguwe n’igihano yahawe kandi namugaragarije neza ko guverinema ya Ostraliya izakomeza kuvugira Yang, aho atari.
Yakomeje agira ati:
“Nagaragaje kandi impungenge zacu ku bijyanye n’abandi banya-Ostraliya bahawe igihano cy’urupfu, nk’uko mu bizi, Ostraliya irwanya igihano cy’urupfu uko byamera kwose kandi ku bantu bose”.
Wong yavuze ko yabwiye mugenzi we w’Ubushinwa ko abanya-Ostraliya “bumiwe” bumvise amakuru y’igihano Yang yahawe.
Uyu muyobozi yongeyeho ko yanagaragaje impungenge ku burenganzira bwa muntu, bice bitandukanye birimo i Xinjiang, Tibet no muri Hong Kong.
Uyu mutegarugori yanumvikanishije ko igihugu cye, gihangayikishijwe bikomeye n’imyitwarire ibuzemo umutekano mu kigobe cya Tayiwani no mu karere.
Forum