Kuri uyu wa gatanu Uburusiya bwatangiye amatora mu gihe Ukraine yongereye ibitero ku mupaka. Umuvugizi wa deparitema ya Leta muri Amerika, yasubiyemo ibyavuzwe n’Uburusiya ko bwatangiye gutora kuri uyu wa gatanu, mw’itora riteganyirijwe kongerera Perezida Vladimir Putin indi myaka itandatu ku buyobozi. Ukraine ifata iryo tora nka “baringa” ikaba yanatangije ibitero mu ntara zo ku mipaka.
Umutegetsi, i Moscou yaburiye abahirahira bagakora imyigaragmabyo mu gihe cy’itora rya perezida hagati y’itariki ya 15 n’iya 17 z’uku kwezi kwa gatatu. Ni nyuma y’uko abatavuga rumwe n’ubutegetsi, barwanya Putin, bahamagariye imyigaragambyo ku cyumweru.
Uburusiya buvuga ko itora rizerekana ko igihugu gishyigikiye byimazeyo ibitero byabwo kuri Ukraine kandi ko ibiro by’amatora byamaze gutegurwa ku butaka bufitwe n’Uburusiya.
Mbere y’itora, Ukraine yagabye ibitero byayo byo mu kirere ku ntara z’Uburusiya, ziri hakurya y’umupaka ibihugu bisangiye.
Ibiro by’amatora byafunguye mu kigobe cya Kamchatka mu burasirazuba bw’Uburusiya, sambiri za mu gitondo kw’isaha yo mu karere kuri uyu wa gatanu, kandi byitezwe ko bifunga sambiri z’ijoro kw’isaha ya GMT ku cyumweru, i Kaliningrad. Aha ni aho Uburusiya buhana imbibi n’ibihugu bya Polonye na Lituwaniya. (AFP)
Forum