Reta ya Etiyopiya n'abaserukira Reta yo mu ntara ya Tigreya, bagiranye ibiganiro bifise intumbero yo gutorera inyishu ibibazo bigisigaye ku vyerekeye gushira mu ngiro amasezerano yo guhagarika ingwano yapfunditswe mu kwezi kw'icumi na rimwe mu mwaka w'i 2022.
Amasezerano yateweko igikumu mu gisagara ca Pretoria, muri Afrika y’epfo, yarafashije kurangiza intambara yihaye inkumbi, yamaze imyaka ibiri mu ntara ya Tigreya.
Hisunzwe ayo masezerano, umuhari Tigray Peoples Liberation Front, TPLF, mu mpfunyapfunyo, waremeye gushira ibirwanisho hasi, gusubiza abarwanyi bawo mu buzima busanzwe hamwe no gushikiriza igisirikare ca reta, ibirwanisho bikomakomeye.
Reta ya Etiyopiya na yo yaremeye kwongereza imfashanyo zigenewe abanyagihugu bo mu ntara ya Tigreya, gukura inteko zo mu mahanga mu gihugu, hamwe no gutanga amafaranga agenewe gusubira gusanura ivyononekaye mu bice vyasinzikajwe n’ingwano.
Yamara abayobozi b’umuhari TPLF bagirije Reta ya Etiyopiya ko itubahiriza amasezerano yapfunditswe, kandi ko yanse gushira mu bikorwa ingingo nkuru nkuru ziri mu masazeranso yahagarikiwe n’ishirahamwe ry’ubumwe bwa Afrika.
Olusegun Obasanjo, yahoze ari Prezida wa Nijeriya na Uhuru Kenyatta yahoze ayoboye igihugu ca Kenya bariko barahuza impande zose mu biganiro hagati ya Reta ya Etiyopiya n’umuhari TPLF.
Forum