Prezida wa Reta Zunze Ubumwe za Amerika, Joe Biden, ahava ashikiriza ijambo abakuru b'ibisagara n'abandi bategetsi b'inzego zo hasi amajana n'amajana mw'ikoraniro rihava ribera mu gisagara ca Washington DC, kuri uyu wa mbere.
Mw’ijambo ryo mu gikorwa co kwiyamamaza yashikirije ku musi wa gatandatu w’indwi irangiye mu gisagara ca Atlanta, muri Reta ya Georgia, Prezida Biden yaragabishije ku vyerekeye inkwirikizi zikomeye hamwe Donald Trump yahoze ari prezida yotsindira ikindi kiringo mu matora rusangi azoba mu kwezi kw’icumi na rimwe kw’uyu mwaka.
Prezida Joe Biden agira ati: "Ubumenyi naronse mu mabanga yose naranguye bwanyigishije gushira imbere kazoza karangwa n’ubwigenge na demokrasi. Jewe na Trump turangwa n’imico itandukanye. Niba mutarabibona, imico yanje ifatiye ku migenzo iranga Amerika, aho ibindi bice vyo kw’isi biturabirako akarorero k’abantu bagendera ubuntu, ukuri n’uburinganire kuri bose. Yamara twese turazi ko Donald Trump abona Amerika mu buryo butandukanye. Abona Amerika irangwa n’ishari hamwe no kwihora. Ivyo si vyo bindanga, kandi si vyo bibaranga na mwebwe."
Donald Trump, na we nyene yaratunganije ikoraniro ku musi wa gatandatu w’iyi ndwi irangiye muri Reta ya Georgia, hafi y’igisagara citwa Rome. Yaragirije Prezida Joe Biden ku vyerekeye urupfu rwa Laken Riley, umuyeshule w’imyaka 22 yiga ivyerekeye ubuvuzi yishwe mu kwezi guheze mu gisagara ca Athens muri Reta ya Georgia.
Umwimukira yinjiye muri Amerika mu buryo butemewe n’amategeko yarahagaritswe inyuma y’uko yagirijwe ko ari we yamugandaguye.
Trump yagize ati: "Laken Riley yari kuba akiri muzima muri iki gihe, iyo Joe Biden atari kuba yaruguruye n’impaka imbibe za Reta Zunze za Amerika, akarekurira inkozi z’ikibi ibihumbi n’ibihumbi kwinjira mu gihugu."
Reta ya Georgia yaragize uruhara rukomeye mw’ihiganwa hagati ya Biden na Trump, mu mwaka w’i 2022.
Biden yatsinze muri iyo reta n’amajwi arenga gatoyi 11.700. Imigambwe yompi uko ari ibiri y’Abademokrate n’Abarepublika iriko iritegurira irindi higanwa, aho abo bategetsi basa n’abanganya amajwi aherutse gutohozwa
Forum