Isirayeri, kuri uyu wa kane, yagirije Afrika y'epfo ko iriko ikoresha sentare mpuzamakungu ijejwe ubutungane ku nyungu z'umurwi Hamas. Ni inyuma y'uko Afrika y'epfo isubiye gusaba sentare mpuzamakungu ijejwe ubutungane gufatira ingingo Isirayeri.
Ubushikiranganji bujejwe imigenderanire bwa Isirayeri bwatangaje ko Afrika y’epfo ibandanya gukora nk’ukuboko kw’umurwi Hamas. Bwavuze ko ari mu ntumbero yo kugeramira uburengtenzira bwa Israyeri bwo kwivuna umwansi, gukingira abanyagihugu bayo, hamwe no kurekura abagizwe imbohe bose. Yamara umuvugizi wa Reta ya Afrika y’epfo yateye ivyatsi ivyo vyagirizo.
Ubushikiranganji bujejwe imigenderanire bwa Isirayeri bwavuze ko ivyo Reta ya Afrika y’epfo iguma isaba sentare mpuzamakungu ijejwe ubutungane mu ntumbero yo gufasha umurwi Hamas ari akandi karorero ko gukoresha iyo sentare mu buryo bugayitse. Bwamenyeshaje ko iyo sentare iza yariyamirije incuro zibiri utwigoro tugenewe kwima Isirayeri uburenganzira bwo kwivuna umwansi.
Clayson Monyela, umuvuguzi w’ubushikiranganji bujejwe imigenderanire no gufashanya n’amakungu bwa Afrika y’epfo, yatangaje ko Afrika y’epfo yerekanye impungenge zayo mu birego yashikirije sentare mpuzamakungu mpanavyaha.Yavuze ko Isirayeri izi neza ivyo irakora, ko kubandanya kuvuga ko Afrika y’epfo iriko ikorera umurwi Hamas, bitagira ishingiro.
Afrika y’epfo, mu kwezi kwa mbere kw’uyu mwaka, yarasavye sentare mpuzamakungu ijejwe ubutungane gutangaza ko Isirayeri iriko ikora ihonyabwoko mu ntara ya Gaza. Yasavye kandi iyo sentare gutegeka Isirayeri guhagarika ibitero iriko ikora mu ntara ya Gaza. Mu ngingo yayo iyo sentare yetegetse Isirayeri kwirinda ibikorwa vy’ihonyabwoko mu ntara ya Gaza. (REUTERS)
Forum