Uyu munsi, Urukiko rw’Ikirenga rwa leta ya Colorado, mu burengerazuba bwa Leta zunze ubumwe z’Amerika, ruratangira kuburanisha ubujurire mu rubanza rw’abaturage bashaka kubuza Donald Trump kwandikwa ku rutonde rw’abakandida mu matora y’umukuru w’igihugu ataha.
Uru rubanza ruturuka ku baturage batandatu bo muri Colorado bafashijwe n’umuryango udaharanira inyungu witwa CREW (Citizens for Responsibility and Ethics in Washington), wazobereye mu byo kujora imikorere igayitse y’abategetsi no kubakurikirana mu mategeko iyo bibaye ngombwa.
Barega Trump kBityo rero ko, bikurikije itegeko nshinga ry’igihugu mu ivugurura ryaryo rya 14 (igika cya 3), guverinoma ya leta ya Colorado idakwiye gushyira izina rya Trump ku mpapuro zo gutora mu majonjora yo mu ishyaka rye ry’Abarepubulikani azahakorwa ku itariki ya 5 y’ukwezi kwa gatatu mu 2024.
Ku itariki ya 17 y’ukwezi gushize, umucamanza wo mu rukiko rw’ibanze rwo ku rwego rwa leta yaciye urubanza, avuga ko Trump afite uruhare mu bikorwa byo
kwigomeka kuri guverinoma y’igihugu, ariko ko afite uburenganzira bw’uko izina rye ryandikwa ku mpapuro z’amatora.
Barajuriye, bavuga ko “bitumvikana ko umuntu wemejweho icyaha cyo kwigomeka ku gihugu yakwemererwa kugira umwanya mu butegetsi, kandi ko binyuranjije n’itegeko nshinga ry’igihugu.” Trump nawe yarajuriye, avuga ko “urukiko rwamuhohoteye, rumwemeza icyaha atigeze akora, kandi ko nta rukiko rufite ububasha bwo kumubuza kwiyamaza no gutorwa.”
Uyu munsi, inteko y’abacamanza bose uko ari barindwi b’Urukiko rw’Ikirenga rwa leta ya Colorado iratangira kumva impande zombi.
Guverinoma ya Colorado isaba ko icyemezo cya nyuma na nyuma cyaba cyarangije gufatwa ku itariki ya 5 y’ukwa mbere gutaha, kugirango imenye niba izashyira, cyangwa niba itazashyira, izina rya Trump ku mpapuro z’abakandida. Nyamara kandi, umwanzuro w’Urukiko rw’Ikirenga rwa leta ya Colorado nawo ushobora kujuririrwa mu Rukiko rw’Ikirenga rwo ku rwego rw’igihugu.
Uretse uru rubanza rwo muri Colorado, izindi nkarwo zizwi ziri mu nkiko za leta byibura zindi esheshatu: Alaska, Maryland, Michigan, New Hampshire, New Mexico, na Rhode Island. (Reuters & AP)
Forum