Igisirikare cya Madagasikari kuri uyu wa gatatu cyaburiye uwo ariwe wese wagerageza guhungabanya umutekano w’igihugu. Ni nyuma y’uko umushinjacyaha mukuru atangarije ko abofisiye babiri bashinjwe gukangurira abantu kwigomeka, mbere y’itora rya perezida ryo kw’itariki ya 16 y’ukwezi kwa 11.
Icumi mu bakandida 12 batavuga rumwe n’ubutegetsi badurumbanyije itora nyuma y’ibyumweru haba imyigaragambyo yaranzwe n’urugomo mu mihanda. Komisiyo ishinzwe amatora yatangaje ko perezida uriho ubu, Andry Rajoelina ariwe watsinze, kandi ko urukiko rushinzwe iyubahirizwa ry’itegeko nshinga ruzemeza amajwi yavuye mw’itora kuwa gatanu.
Umushinjacyaha, Narindra Rakotoniaina, mw’itangazo mw’ijoro ryo kuwa kabiri yavuze ko abofisiye mu gisirikare babiri bafunzwe kandi ko bazaguma mu buroko kugeza bitabye urukiko tariki 16 y’ukwezi kwa mbere. Ntiyavuze amazina y’abo bofisiye cyangwa amapeti yabo.
Avugana n’abanyamakuru mu murwa mukuru Antananarivo, kuri uyu wa gatatu, jenerali, William Michel Andriamasimanana, ntacyo yavuze kw’itabwa muri yombi, ariko yavuze ko igisirikare cyiyemeje kwubaha ibyavuye mu matora.
Yagize ati: “Ikintu cyose cyahungabanya umutekano mu buryo buziguye cyangwa butaziguye, byaba bikozwe n’uri imbere cyangwa hanze y’igihugu, ikintu cyabangamira iterambere rya Madagasikari umuyobozi utaha yayigezaho, ntikizihanganirwa”.
Rajoelina yafashe ubutegetsi bwa mbere mu gihugu gituwe na miliyoni 30, akuyeho uwari perezida icyo gihe, Marc Ravalomanana muri kudeta yo mu 2009. Yatanze ubutegetsi muri 2014 nyuma y’imyaka hafi itanu ari umuyobozi w’inzibacyuho kandi yatsinze itora ryo mu mwaka wa 2018. (Reuters)
Forum