Inteko za Israyeri n'ibimodoka vya Bulende, kuri uyu wa mbere, zinjiye mu gice co mu buraruko bw'intara ya Gaza. Zaguye ibikorwa vyazo kurushiriza muri iyo ntara.
Itororokanirizo ry’amakuru ryo muri Amerika, Associated Press, ryatangaje ko ryaronse amasanamu mu ya videwo yerekeye ikimodoka ca burende n’ikimashini co gusenya amazu vyazibiye ibarabara rikuru riva mu buraruko rija mu bumanuko bw’intara ya Gaza.
Israyeri ivuga ko Abanyapalestina barikoresha mu guhunga ibitero vy’inteko zirwanira ku butaka zayo zinjiye muri Gaza.
Igisirikare kirwanira mu kirere ca Israyeri catangaje ko cakoze ibitero mu bibanza 600 mu ntara ya Gaza mu masaha 24 arangiye. Israyeri yavuze ko yakoze ibitero muri Siriya na Libani.
Igisirikare cayo, kuri uyu wa mbere, catangaje ko vyari mu ntumbero yo kwishura ku bitero vyakozwe ku butaka bwayo biturutse muri ivyo bihugu vyompi.
Igisirikare ca Israyeri catangaje ko mu gutana mu mitwe kwabaye hagati y’inteko zaco n’abo cise abakora iterabwoba mu ntara ya Gaza, cishemo abatari bake bari biyugaraniye mu nyubakwa no mu mayira ari musi y’ubutaka bari bageregeje gutera inteko zaco.
Yamara umurwi Hamas, watangaje ko abarwanyi bawo basambuye ibimodoka vya burende vya Israyeri bakoresheje misile mu burarurko bwa Gaza. Bateye ivyatsi amakuru avuga ko inteko za Israyeri zinjiye gushika kure mu ntara Gaza.
Nta makuru yigenga yashoboye kwemeza ivyatangajwe n’izo mpande zompi.
Forum