Ubufransa, kuri uyu wa kane, bwatangaje ko buzotangura gukura inteko zabwo muri Nijeri muri iyi ndwi. Ubufransa bwabitangaje inyuma y’uko butumvikanye n’abasirikare bafashe ubutegetsi muri Nijeri kuva habaye kudeta mu kwezi kw’indwi kw’uyu mwaka.
Abategetsi b’igisirikare c’Ubufransa batangaje ko bazokora ico gikorwa bafatanije n’abanyanijeri. Ivyo Ubufransa bwatangaje bibaye indwi imwe inyuma y’uko ambasaderi w’Ubufransa muri Nijeri atahutse mu gihugu ciwe. Hari inyuma y’uko aremewe n’abategetsi b’abasirikare bayoboye Nijeri.
Prezida w’Ubufransa, Emmanuel Macrorn, kw’italiki 24 y’ukwezi kw’icenda kw’uyu mwaka, yaratangaje ingingo yo gukura inteko z’Ubufransa, 1,400 ziri muri Nijeri mu mpera z’uyu mwaka.
Abo basirikare bari muri ico gihugu mu gikorwa co kurwanya intagondwa z’abayislamu zikorera mu karere ka Sahel. Inteko 400 zikorana n’inteko za Nijeri mu buraruko bushira uburengero bw’igihugu hafi y’urubibe n’ibihugu vya Burkina Faso na Mali. Ni akarere abarwanyi ba reta ya kiyislamu bakoreramwo.
Abasirikare bafashe ubutegetsi muri Nijeri bamaze igihe basaba ko inteko z’Ubufransa ziva muri ico gihugu. Imyiyerekano itari mike yo gusaba ko izo nteko ziva muri Nijeri yarabaye mu gihugu. Vyitezwe ko inteko z’Ubufransa ziva muri Nijeri ziciye muri Benin mu bumanuko bw’igihugu, canke muri Chad mu buseruko. (AFP)
Forum