Ibihugu vya Maroke, Portugal na Esipanye, Arijantine, Uruguay na Paraguay bizokwakirira hamwe igikombe c'isi yose co mu mwaka w'i 2030.
Ishirahamwe FIFA ryatangaje ko, uretse inkino zizobera mu Burayi n’Afurika, izindi zizobera muri Amerika yo mu bumanuko. Urukino rumwe ruzabera mu murwa mukuru Montevidewo muri Uruguay, urwa kabiri I Buenos Aires muri Arijantine naho urwa gatatu rubere Asuncion muri Paraguay. Biri mu ntumbero y’ibirori vyo guhimbaza imyaka ijana izoba irangiye kuva igikombe ca mbere c’isi yose c’umupira w’amaguru, kibereye muri Uruguay, mu mwaka w’i 1930.
Ishirahamwe FIFA ryatangaje ko ivyo birangije uguhinganwa gukomeye hagati y’impande 2. Uruhande rumwe rwari rugizwe n’ibihugu vya Espanye na Portugal mu gihe urundi ruhande, rwari rugizwe na Argentina, Uruguay, Chili na Paraguay. Abagize inama y’ishirahamwe FIFA, iserukira umupira w’amaguru kw’isi baremeye ata numwe avuyemwo guhimbaza imyaka ijana irangiye, amahiganwa y’igikombe c’isi yose c’umupira w’amaguru, atanguye.
FIFA ryamenyesheje ko ibihugu bizokwakira igikombe c’isi yose co mu mwaka w’i 2030, bizokwemezwa icese n’ikoraniro ryayo rizoba mu mwaka uza, ata kibazo na gitoyi.
Yamara abashigikiye umupira w’amaguru ku mugabane w’Ubulaya, bo mu murwi witwa, “Football Supporters Europe” baranebaguye buno nyene iyo ngingo ya FIFA. Bavuze ko uko abantu basanzwe bazi igikombe c’isi yose c’umupira w’amaguru, birangiye. Mu butumwa ku rubuga X, rwahoze rwitwa, Twitter, bavuze ko iyo ngingo igayitse cane. Batangaje ko FIFA ibandanya gusambura ihiganwa riteye igomwe kurusha ayandi kw’isi. (AFP)
Forum