Uburusiya Bwagirizwa Igitero c'Indege Cahitanye Abagera kuri 10 muri Siriya

Igitero c’indege cagabwe mw’isoko idandarizwamwo imboga mu bumanuko bushira uburengero bwa Siriya cahitanye ababa 10. Abaharanira agateka ka zina muntu muri Siriya bavuze ko abarenga 30 bakomerekeye muri ico gitero. Biteze ko ibitigiri vy’abakiguyemwo vyiyongera, kuko mu bakomeretse hoba harimwo “Abasandavye bakimara gushikanwa kwa muganga.”

Ishirahamwe, Observatoire syrien des droits de l'homme, rifise icicaro mu Bwongereza rikaba rikurikiranira hafi ivya Siriya n’abaharanira agateka ka zina muntu batandukanye bavuze ko igitero c’uno wa Mungu cagabwe n’Uburusiya bufatwa nka soma mbike wa Prezida Bashar Assad.

Isoko y’imboga yatewe isumiramwo abantu benshi. Iri mu gisagara ca Jisr al-Shughur, kiri mu minwe y’abatavuga rumwe na Prezida wa Siriya. Ico gisagara gihana imbibe na Turukiya.

Yaba Uburusiya, yaba Siriya, nta ruhande na rumwe ruragira ico ruvuga kuri iki gitero.