Mu mujyi wa Khartoum, umurwa mukuru wa Sudani hiriwe humvikana urusaku rw’amasasu mu ntambara hagati y’ingabo za Leta n’abarwanyi bitwara gisirikari ba RSF - Rapid Support Forces.
Abantu barenga 500 bamaze kwicwa kuva iyi ntambara itangiye tariki ya 15 y’uku kwezi kwa Kane.
Yatangijwe n’ubwumvikane buke hagati ya Jenerali Abdel Fattah al-Burhan uyoboye igihugu na Mohamed Hamdan Dagalo wari umwungirije.
Umunyamabanga mukuru w’umuryango w’abibumbye Antonio Guterres yasabye impande zombi guhagarika imirwano ku bw’inyungu za rubanda.
Avugira kuri televiziyo Al Arabiya, Guterres yavuze ko nta kamaro kari mu kurwanira ubutegetsi igihugu kirimo gusenyuka.
Impande zombi zagiye zemeranya ku ihagarika ry’imirirwano ariko ntibyubahirizwe. Amasezerano aheruka yo guhagarika imirwano ararangirana n’iki Cyumweru.
Aya yari yagezweho ku busabe bwa Leta zunze ubumwe z’Amerika n’Umuryango w’Afurika yunze ubumwe.
Umwe mu batuye umujyi wa Khartoum yabwiye ibiro ntaramakuru y’Abafransa ,AFP, ko ayo masezerano ntacyo amaze kuko buri gitondo babyuka buva urusaku rw’amasasu n’indege z’intambara zirasa mu ma karitiye.
Mu mujyi wa Omdurman, hari uwavuze ko imirwano yiriwe hafi yahakorera radiyo na televiziyo by’igihugu. Iyi ntambara yatumye abaturage barenga miliyoni eshanu batuye umujyi wa Khartoum batava mu ngo zabo.
Ministeri y’ubuzima ivuga ko abantu 512 ari bo bimaze kumenyekana ko bahitanywe n’intambara abandi barenga 4,000 barakomeretse.
Hagati aho abantu hafi 75,000 bamaze gukurwa mu byabo abandi bahungira mu bihugu bituranye na Sudani birimo Misiri, Etiyopiya, Cadi, na Sudani y’epfo.
Facebook Forum