Mu ntara ya Kivu ya Ruguru, leta iravuga ko yatahuye imirambo y'abantu 60 bishwe. Naho mu ntara ya Ituri, ibitero by'inyeshyamba byirukanye abaturage ibihumbi mu byabo.
Muri Kivu ya Ruguru, ubwo bwicanyi bwabereye mu midugudu ya Kashali na Kazaroho, muri teritwari ya Rutshuru. Isaac Kibira, guverineri wungirije, yabwiye itangazamakuru ko bakeka ko ari M23 yabishe urw’agashinyaguro. Ati: “Twasanze baboshye n’inzitiramibu n’imifuka yo gutwaramo ibintu.”
Naho mu ntara ya Ituri, sosiyete sivile ya teritwari Irumu irarega inyeshyamba za Codeco (ubundi bivuze Coopérative pour le Développement du Congo) ko zahishe abantu 19 ejobundi kuwa kabiri. Codeco igizwe ahanini n’abo mu bwoko bwa Lendu, cyane cyane b’abahinzi. Bahora barwana n’imitwe y’abo mu bwoko bwa Hema (biganjemo aborozi) byibura kuva mu 2017. Mu kwezi kwa kabiri gushize, bishe abasivili 32.
Umuryango w’Abibumbye uvuga ko ibitero bya Codeco byakuye mu byabo abantu barenga 500,000 hagati y’ukwezi kwa mbere n’ukwa gatatu muri uyu mwaka muri Ituri. Bongereye umubare w’abantu bose hamwe barenga miliyoni eshatu bakeneye cyane gufashwa mu burasirazuba bwa Kongo, nk’uko Loni ibitangaza.
Facebook Forum