Abakozi 2 ba Catholic Relief Services Biciwe muri Etiyopiya

Abakozi babiri b'umuryango Catholic Relief Services, CRS, ufite icyicaro muri Leta zunze ubumwe z'Amerika biciwe mu ntara ya Amhara muri Etiyopiya mu mpera z'icyumweru gishize.

Uyu muryango uvuga ko abo bakozi bawo bishwe mu gihe muri iyo ntara iri mu majyaruguru y’igihugu hakorwa imyigaragambyo yo kwamagana iseswa ry’ingabo zayo.

Uyu muryango uvuga abo bishwe ni Chuol Tongyik wari ushinzwe umutekano n’umushoferi Amare Kindeya. Bishwe barashwe bari mu modoka y’akazi berekeza Addis Ababa bavuye mu butumwa bw’akazi. CRS ivuga ko kugeza ubu itaramenya impamvu abo bakoze bishwe.

Zemede Zewdie, uhagarariye uyu muryango muri Etiyopiya, yavuze ko ubwo bwicanyi butazabaca intege zo gukomeza gufasha Abanyetiyopiya bakeneye ubufasha. Uyu muryango uvuga ko umaze imyaka hafi 60 ukorera muri iki gihugu.

Kuri uyu wa kabiri, umuryango mpuzamahanga wita ku mbabare CICR, wavuze ko uhangayikishijwe n’ibitero bimaze iminsi bigabwa ku mbangukira gutabara zawo muri ako gace ka Amhara.

Ku rubuga rwa twitter CICR yanditse ko abakozi bashinzwe ubuzima, imbangukira gutabara n’amavuriro akwiye kurindirwa umutekano aho kugabwaho ibitero. Ku cyumweru ministiri w’intebe wa Etiyopiya, Abiy Ahmed, yavuze ko umugambi wo gusenya igisirikari cy’intara zitandukanye ari uwo kubaka ubumwe n’igisirikari kimwe cy’igihugu. (AFP)