Uko wahagera

Xi Jinping Yatorewe Manda ya Gatatu yo Kuyobora Ubushinwa


Xi Jinping ni Perezida w'Ubushinwa
Xi Jinping ni Perezida w'Ubushinwa

Mu Bushinwa, inteko ishinga amategeko yatoreye Xi Jinping manda ya gatatu ku mwanya wa perezida wa Repubulika. Ni we bibayeho wa mbere nyuma ya Mao Tse Tung.

Inteko ishinga amategeko y’Ubushinwa ishyirwaho n’ishyaka rimwe rukumbi riri ku butegetsi kuva mu 1949. Iterana rimwe mu mwaka. Yatangiye imirimo yayo ku cyumweru gishize, bwa mbere muri iyi myaka itatu ishize kubera Covid-19.

Abayigize bose, nta n’umwe uvuyemo, batoye Xi Jinping, wari kandida wenyine gusa. Manda ye izamara indi myaka itanu. Bamutoreye no kuba umugaba w’ikirenga w’ingabo z’igihugu, zigizwe n’abasirikare miliyoni ebyiri.

Xi Jinping afite imyaka 69 y’amavuko. Afite ubutegetsi bwose mu maboko ye. Mu kwezi kwa cumi gushize, nabwo ishyaka ryari ryamutoreye kuribera umunyamabanga mukuru, umwanya waryo wa mbere wo hejuru. Ni bwo kandi ishyaka ryakuye mu itegeko nshinga manda ntarengwa ebyiri, zari zarabaye umuco mu myaka hafi 50 ishize.

Xi Jinping abaye igihangange cya mbere nyuma ya Mao Tse Tung, washinze Repubulika ya gikomunisiti mu 1949, ategeka kugera yitabye Imana mu 1976. Yongeye gutorwa mu bihe bitoroshye.

Muri iki gihe, Ubushinwa bufitanye amakimbirane akomeye na Leta zunze ubumwe z’Amerika n’inshuti zayo kubera Tayiwani, kuba inyuma y’Uburusiya mu ntambara bwagabye kuri Ukraine, ubucuruzi, n’uburenganzira bwa muntu.

Mu gihugu imbere, Ubushinwa bufite ibibazo by’ubukungu byatewe na Covid-19. Xi Jinping yahagaritse ingamba zikaze yari yarashyizeho zo kuyirinda abaturage bamaze gukora imyigaragambyo y’akataraboneka mu kwezi kwa 12 gushize. Leta y’Ubushinwa ntiyatangaje umubare w’abaturage bayo bishwe na Covid-19.

Facebook Forum

XS
SM
MD
LG