Muri Leta zunze ubumwe z'Amerika, Visi-Perezida Kamala Harris, uyu munsi arifatanya n'umuryango wa nyakwingendera Tyre Nichols, wishwe n'abapolisi mu mujyi wa Memphis, muri leta ya Tennessee, mu majyepfo y'igihugu.
Umwirabura Nichols, w’imyaka 29 y’amavuko, yishwe mu kwezi gushize ahondaguwe n’abapolisi. Batanu bahise birukanwa. Abandi babiri bahagaritswe by’agateganyo ku kazi kabo. Abantu batatu bo mu butabazi bwihutirwa bwa kizimyamoto n’ambilansi (imodoka zitwara abarwayi barembye) nabo barirukanwe.
Nyuma yaho mu cyumweru gishize, umukuru w’igihugu, Joe Biden, yahamagaye umuryango wa Nichols kuri telefonI, abafata mu mugongo, anabatumira kuzaza mu nteko ishinga amategeko gukurikira ijambo azageza ku gihugu mu mugoroba wo kuwa kabiri w’icyumweru gitaha.
Ejo hashize, Visi-Perezida Kamala Harris nawe yavuganye n’umuryango, umutumira kuza kwifatanya nawo uyu munsi mu mihango yo gusezera kuri nyakwigendera. Koko rero yagiyeyo. Mu bamuherekeje harimo abajyanama bakuru babiri ba Perezida Biden.
Yasanzeyo kandi impirimbanyi y’uburenganzira bwa muntu Rev. Al Sharpton, pasitiro wo mu itorero ry’Ababatista, n’imiryango y’abandi Birabura bishwe n’abapolisi mu 2020, barimo na Philonise Floyd, umuvandimwe wa George Floyd. Impfu za Taylor na Floyd zateye imyigaragambyo y’akataraboneka mu gihugu, yo kwamagana ubusumbane mu butabera kubera amoko.
Facebook Forum