Ejo ku cyumweru, abayoboke amagana n’amagana b’uwahoze ayobora Brezil, Jair Bolsonaro, bigabije ingoro y’umukuru w’igihugu, inteko ishinga amategeko n’urukiko rw’ikirenga, baramenagura, baresenyagura. Bashakaga ko igisirikare gikuraho Perezida Luiz Lula, no gusubizaho Bolsonaro. Ntibemera ko yatsinzwe amatora yabaye ku itariki ya 30 y’ukwa cumi gushize. Nyuma yayo, nabwo bigabijeimihanda barayifunga.
Guverino ya Lula yatangaje ko igomba gukora ibishoboka byose kugirango irengere demokarasi kandi ko ubutabera bugomba gukora akazi kabwo. Minisitiri w’ubucamanza, Flávio Dino, avuga ko ibyabaye ku cyumweru ari ibikorwa by’iterabwoba n’umugambi wo gukora kudeta. Mu kiganiro yagiranye n’abanyamakuru, yasobanuye ko inzego zibishinzwe zatangiye gukusanya ibimenyetso no guhiga abateye, ababishyuriye bisi zabagejeje mu murwa mukuru. Bamaze guta muri yombi abarenga 1,200.
Iminsi ibiri mbere y’uko Perezida Lula yimikwa, ku itariki ya mbere y’uku kwezi, Bolsonaro yuriye indege, yigira muri Leta zunze ubumwe z’Amerika. Ari muri leta ya Florida. Yanditse kuri Twitter ko abayoboke be “barenze umurongo.” Perezida Joe Biden nawe yamaganiye kure ibyabaye ku cyumweru muri Brezil. Yatangaje kuri Twitter ko “ari igitero kuri demokarasi n’ihererekanyabutegetsi rinyuze mu mutuzo” kandi ko azakomeza gukorana na Perezida Lula. (AP)
Facebook Forum