Inzego z’umutekano zatangaje ko abantu barindwi biciwe mu bushyamirane bw’amoko bwongeye kwaduka muri leta ya Blue Nile mu majyepfo ya Sudani. Abandi barenga 23 bakomeretse.
Komite y’umutekano yavuze ko mu matariki yo hagati mu kwezi kwa karindwi, abantu batari munsi 105 barishwe, abandi ibihumbi bateshejwe ibyabo n’imirwano hagati y’amoko y’Abahausa n’Abafunj, amaranira ubutaka. Ubwo bushyamirane bwanakwiriye no mu zindi leta.
Iyo komite ishinzwe umutekano yavuze ko iperereza ryo kumenya impamvu y’ubw bwicanyi rigikorwa. Mw’itangazo ryashyizwe ahagarara mw’ijoro ryakeye, komite ishinzwe umutekano yatangaje umukwabu mu mijyi ibiri minini kandi yaciye ibiterane bitari ngombwa.
Umwuka mubi hagati y’Abafunj n’Abahausa wiyongereye mu kwezi kwa karindwi nyuma y’uko Abafunj, batuye igihe kirekire Leta ya Blue Nile bareze Abahausa batuye mu turere duhingwa tw’igihugu, kuba bagerageza kubatwara ibice by’ubutaka bwabo.
Hagiye haba urugomo mu ntara zo ku nkombe z’uburasirazuba no mu burengerazuba bwa Darfur, n’ubwo imwe mu mitwe irwanya ubutegetsi yasinyiye mu murwa mukuru Juba, amasezerano y’amahoro y’igihugu cyose mu mwaka wa 2020.
Abigaragabyaga bashinje ubuyobozi bwa gisirikare bwa Sudani, kuba bwarananiwe kurinda abasiviri no guhembera urugomo rushingiye ku moko.
Abayobozi ba gisirikare bafashe ubutegetsi mu kwezi kwa 10 umwaka wa 2021, bavuga ko bashaka kubumbatira umutekano w’igihugu, no kubungabunga amasezerano y’amahoro.
Reuters
Facebook Forum