Imirwano Yongeye Kubura Hagati y'Ingabo za Leta ya Etiyopiya n'iz'Intara ya Tigreya

Imirwano yari imaze amezi atanu yarahagaze. Yubuye uyu munsi mu nkengero z'umujyi witwa Kobo, mu majyaruguru ya Etiyopiya n'amajyepfo ya Tigreya.

Impande zombi zitana ba mwana. Mu itangazo yashyize ahagaragara, guverinoma ya minisitiri w'intebe Abiy Ahmed yemeza ko ingabo za TPLF (Front de Libération du Peuple du Tigré) ari zo "zarenze ku masezerano yo guhana agahenge, zitera ahitwa Bisober, Zobel na Tekulshe."

Ku rundi ruhande, TPLF, nayo mu itangazo yashyize ku mugaragaro, ivuga ko ingabo za leta ya Etiyopiya, zifatanyije n'imitwe yitwara gisilikare y'Amhara, imwe mu ntara zigize igihugu, ari zo "zababanje, zigaba ibitero simusiga bikaze cyane mu gitondo saa kumi n'imwe mu bice bya Alamata."

Intambara yo muri Tigreya yatangiye mu kwezi kwa 11 mu 2020. Kugeza ubu, impande zombi zananiwe kwicara hamwe mu mishyikirano.

Mu cyumweru gishize, umuvugizi wa minisitiri w'intebe Abiy Ahmed yabwiye abanyamakuru ko abayobozi ba Tigreya "banze ibiganiro by'amahoro." Naho ejo kuwa kabiri, umukuru wa Tigreya, Debretsion Gebremichael, yatangarije ikigo ntaramakuru AP cyo muri Amerika ko "abayobozi ba gisivili na gisilikare bo ku mpande zombi baherutse guhura mu ibanga rikomeye inshuro ebyiri," ariko ko ntacyo byatanze kuko "guverinoma ya Etiyopiya yabashyizeho amananiza" adasobanura ayo ari yo.