Prezida wa Cote d'Ivoire, Alassane Ouattara, arabonana uno musi ku wa kane n'abo yasubiriye, Laurent Gbagbo na Henri Konan Bedie, mu kigoro k'ukunywanisha abanyagihugu imbere y'amatora ategekanijwe kuba mu mwaka w'i 2025.
Itangazo rya reta ryamenyesheje guhura kw’abo bategetsi vyerekana ukwiyemeza kwa Prezida Ouattara ku vyerekeye amahoro. Iryo tangazo rivuga ko Henri Konan Bedie na Laurent Gbagbo bayoboye abatavuga rumwe na reta bategerezwa kwerekana ko bipfuza gukorera amahoro.
Abaserukira abo bategetsi babiri bemeje ko bitaba inama na Prezida Ouattara itegekanaijwe mu masaha yo ku muhingamo y’uyu musi ku wa kane. Abo bategetsi batatu bayoboye Cote d’Ivoire mu bihe vyaranzwe n’ibibazo vya politike vyo mu myaka y’i 1990.
Henri Konan Bedie yari prezida kuva mu mwaka w’i 1993 gushika akurwe ku butegetsi muri kudeta yabaye mu mwaka w’i 1999. Laurent Gbagbo yabaye prezida kuva mu mwaka w’i 2000 gushika atsindwe mu matora na Ouattarra mu mwaka w’i 2010.
Yaranse kwemera ko yatsinzwe mu matora, mu vyatumye haba ingwano yamaze igihe gitoyi yahitanye abantu bagera ku 3,000 imbere y’uko abarwanya ubutegetsi bashigikiye Ouattara bafata igisagara ca Abidjan.
Gbagbo yararungitswe muri sentare mpuzamakungu mpanavyaha y’i La Haye yagirizwa ivyaha vyo mu ntambara n’ivyaha vy’agahomerabunwa. Yarambitswe izera mu mwaka w’i 2019, akaba yagarutse muri Cote d’Ivoire mu mwaka uheze w’i 2021.
Ikiringo ca Prezida Ouattara c’imyaka cumi yamaze ku butegetsi caranzwe n’umutekano ugereranye. Yamara abantu batari bake barishwe mu gutana mu mitwe kwadutse imbere y’amatora yo mu mwaka w’i 2020, igihe yitoza mu kiringo kigira gatatu, Gbagbo na Bedie bavuze ko ivyo biciye kubiri n’ibwirizwa shingiro.(Reuters)
Facebook Forum