Perezida wa Leta zunze ubumwe z'Amerika, Joe Biden, yakiriye inama ya cyenda y'abakuru b'ibihugu ba z'Amerika zose mu mujyi wa Los Angeles, mu burengerazuba bw'iguhugu. Baraganira cyane cyane ku bibazo by'ubukungu n'iby'abimukira.
Iyi nama, izamara iminsi itatu, ni iya kabiri ibereye muri Leta zunze ubumwe z'Amerika. Perezida Bill Clinton niwe wakiriye iya mbere na mbere yabaye mu kwezi kwa 12 mu 1994, mu mujyi wa Miami, mu majyepfo y'igihugu.
Mu rwego rw'iri koraniro ry'abakuru b'ibihugu by'Amerika zose, Leta zunze ubumwe z'Amerika yakoresheje i Los Angeles n'ihuriro rya cyenda rya sosiyete sivile, irya gatandatu ry'urubyiruko, n'irya kane ry'abashoramali y'Amerika zo haruguru, hagati, hepfo na za Caraibes.
Mu rwego rw'ubukungu, Perezida Biden arateganya gutangaza umugambi w'ubufatanye ugamije guhangana n'ingaruka z'icyorezo cya Covid-19, gutsura ubuhahirane, ishoramali, Banki Nyamerika y'Iterambere, n'imilimo ishamikiye ku ngufu zidahumanya ikirere.
Naho ku birebana n'abimukira, inama ya Los Angeles izasozwa n'itangazo risaba ibikorwa bifatika ku bibazo by'abantu bahunga ubwicanyi, kubuzwa amahwemo, n'ubukene mu bihugu byabo.
Leta zunze ubumwe z'Amerika ni yo abimukira bashaka kujyamo cyane cyane, ku buryo kuva mu 2017 ikibazo cyabaye ingorabahizi kuri guverioma. Ariko rero si yo yonyine.
Colombia, ibihugu baturanye muri Amerika y'Epfo, n'ikirwa cya Aruba bafite amamiliyoni y'abantu bahunze imvururu n'ubwicanyi muri Venezuela. Muri Mexique, abantu barenga 130.000 barashaka ubuhungiro. Abenshi muri bo bakomoka muri Haiti. Costa Rica nayo ifite abantu ibihumbi n'ibihumbi bahunze Nicaragwa.
Inama y'i Los Angeles ariko yajemo agahu. Leta zunze ubumwe z'Amerika yanze gutumira Cuba, Venezuela na Nicaragwa, kubera, nk'uko yabisobanuye, "ibibazo bafite bya demokarasi n'uburenganzira bwa muntu."
Icyemezo cya Leta zunze ubumwe z'Amerika cyatumye abakuru b'ibihugu bya Mexique, Guatemala, Honduras na El Salvador batangaza ko bafashe icyemezo cyo gutajya mu nama. Ariko ikoranyije abandi barenga 20, barimo abayobozi ba Canada, Brezil, n'Argentine.
Facebook Forum