CAF, ishyirahamwe ry'umupira w'amaguru muri Afrika, ryatangaje ko Kenya na Zimbabwe batazajya mu majonjora y'igikombe cy'Afrika 2023. Imikino y'amajonjora izatangira ku itariki ya mbere y'ukwezi gutaha. Kenya yari mu itsinda rya gatatu, C, hamwe n'Uburundi, Kameruni, na Namibiya. Naho Zimbabwe yari mu itsinda rya 11, K, hamwe na Liberiya, Maroc, n'Afrika y'Epfo.
Mu itangazo yashyize ahagaragara, CAF ivuga ko ibihugu byombi bizize ko byananiwe kurangiza ikibazo bifitanye na FIFA, ishyirahamwe ry'umupira w'amaguru ku isi. Koko rero, ku itariki ya 24 y'ukwa kabiri gushize, FIFA yahagaritse Kenya na Zimbabwe mu marushanwa mpuzamahanga kubera ko, nk'uko yabisobanuye, "guverinoma zabo zivanga mu mikorere y’amashyirahamwe y’umupira w’amaguru yabo."
Ku itariki ya 19 y'ukwa kane gushize, CAF yakoresheje tombola yo gushyira ibihugu mu matsinda y'amajonjora y'igikombe cy'Afrika CAN 2023. Yagumishijemo na Kenya na Zimbabwe ariko ibasaba gukemura amakimbirane yabo na FIFA mu byumweru bibiri byari kubanziriza imikino yabo ya mbere y'amajonjora. Ntibabishoboye rero.
CAF yasobanuye ko amatsinda Kenya na Zimbabwe barimo azakomeza gahunda y'imikino uko iteganyijwe. Mu mikino yose Kenya na Zimbabwe bagombaga guzahatanamo bazajya bandikirwa ko batsinzwe. Bitwo amajonjora azarangira bandikiwe ko bafite amanota ubusa.
Naho muri buri tsinda, abazaba uwa mbere n'uwa kabiri bazajya mu mikino ya nyuma y'igikombe cy'Afrika cy'ibihugu, kizakinirwa muri Côte d’ivoire kuva ku itariki ya 23 y'ukwa gandatu kugera ku ya 23 y'ukwa karindwi 2023.
Facebook Forum