Uko wahagera

RDC: Leta Yatangiye Gutanga Inkingo za Ebola mu Mujyi wa Mbandaka


Umwana uhabwa urukingo rwa Ebola
Umwana uhabwa urukingo rwa Ebola

Repubulika ya demokarasi ya Kongo yatangije ibikorwa by’ikingira rya Ebola, kugira ngo ihagarike icyorezo mu mujyi wa Mbandaka mu majyaruguru y’uburengerazuba bw’igihugu.

Ishami rya ONU ryita ku buzima, OMS, ryatangaje ko abantu babiri kugeza ubu, bizwi ko bapfuye muri uwo mujyi urimo abantu miliyoni imwe, baturiye umuhanda werekeza mu murwa mukuru Kinshasa kandi begereye amazi.

Umuntu wa mbere yapfuye taliki 21 y’uku kwezi kwa kane. Uwa kabiri yapfuye ejo kuwa kabiri. Ibi byatumye havugwa icyorezo cya Ebola ku ncuro ya 14 muri iki gihugu.

Inkingo zigera kuri 200 za Ebola, rVSV-ZEBOV, zagejejwe i Mbandaka zivuye mu mujyi wa Goma mu burasirazuba bwa Kongo kandi izindi zizagerayo mu minsi iri imbere, nk’uko bivugwa mw’itangazo rya OMS. Iryo tangazo rikomeza rivuga ko kugeza ubu, abantu 233 byamenyekanye ko bahuye n’abishwe na Ebola kandi barimo gukurikiranirwa hafi.

Virusi ya Ebola yabonetse bwa mbere hafi y’uruzi rwa Ebola mu majyaruguru ya Congo mu 1976. Igihugu cyabayemo ibyorezo bya Ebola incuro 13 harimo kimwe mu 2018 kugeza muri 2020 mu burasirazuba, aho iyi ndwara yishe abantu hafi 2.300.

Icyorezo giheruka cyarangiye mu kwezi kwa 12 mu burasirazuba kandi cyahitanye abantu batandatu. Mbandaka umurwa mukuru w’intara ya Ekwateri, wabayemo ibyorezo mu mwaka wa 2018 no muri 2020.

Ubushakashatsi bwakozwe bwerekanye ko iki cyorezo kiriho ubu, cyaturutse ku nyamaswa zari zirwaye, ko ntaho gihuriye n’ibyorezo byabanje.

Reuters

Facebook Forum

XS
SM
MD
LG