Uregwa yitwa Ali Muhammad Ali Abd-Al-Rahman, uzwi no ku izina rya Ali Kushayb. Yahoze ari umwe mu bayobozi bakuru b'umutwe Janjaweed. Aregwa ibyaha by'intambara n'ibyibasiye inyokomuntu 31, birimo ubuhotozi, gutoteza, gufata ku ngufu, no kwica urubozo inzirakarengane. We arabihakana.
Ali Kushayb ni we ubwe witanze. Yishyize mu maboko ya CPI muri Repubulika ya Centrafrika mu kwezi kwa gatandatu 2020. Yahise yoherezwa muri gereza ya CPI i La Haye mu Buholandi. Yari amaze imyaka 13 ashakishwa.
Ku miryango iharanira uburenganzira bwa muntu, urubanza rwa Ali Kushayb ni intambwe ikomeye ku butabera bw'abahohotewe.
Ubwicanyi bwo muri Darfur bwatangiye mu 2003 ubwo Abirabura bo muri Darfur bafashe intwaro bashaka kurwanya leta. Guverinoma yashinze umutwe w'Abarabu witwa Janjaweed kugirango uyifashe mu rugamba. Umuryango w'Abibumye uvuga ko iyi ntambara yahitanye abantu bagera ku 300,000, ijugunya mu buhingiro n'abandi barenga miliyoni ebyiri, kandi ko yabayemo ibyaha bya jenoside, ibyaha by'intambara n'ibyaha byibasiye inyokomuntu, byakorewe cyane cyane abo mu bwoko bw'aba Fur b'Abirabura.
Mu bo CPI ibikurikiranyeho, harimo n'uwahoze ari umukuru w'igihugu cya Sudani, Omar Hassan al-Bashir. Ntarashyikirizwa uru rukiko. Kuva ahiritswe ku butegetsi mu 2019, aracyari muri gereza i Khatoum muri Sudani.
Facebook Forum