Uko wahagera

Isomwa ry'Urubanza Ruregwamo Rusesabagina Ryimuwe


Paul Rusesabagina ntiyigeze yitabira iburanishwa ry'ubujurire bw'ubushinjacyaha
Paul Rusesabagina ntiyigeze yitabira iburanishwa ry'ubujurire bw'ubushinjacyaha

Urukiko rw’Ubujurire mu Rwanda rwasubitse isomwa ry’urubanza ubushinjacyaha buregamo umunyapolitike Paul Rusesabagina, n'abandi areganwa. Urukiko ruvuga ko iminsi 30 rwihaye idahagije ngo rube rwasoje kwandika urubanza.

Abaregwa uko ari 21 bakurikiranweho ibyaha by’iterabwoba bishingiye ku bitero byagabwe n’umutwe wa FLN mu nkengero z’ishyamba rya Nyungwe.

Ubushinjacyaha bwajuririye uru rubanza rusaba ko abaregwa barimo umunyapolitike Paul Rusesabagina bongererwa ibihano. Bwasabiye Rusesabagina gufungwa burundu. Undi baregwana Nsabimana Callixte wari wakatiwe igifungo cy’imyaka 20 bumusabira gufungwa imyaka 25.

Usibye ubushinjacyaha bwajuriye busaba urukiko rw’ubujurire kuzamura ibihano by’abaregwa, abaregwa nabo bari bajuririye urukiko basaba kugabanyirizwa ibihano. Hari n'abaregera indishyi nabo bagaragaje ko batanyuzwe n’uburyo urukiko rutabahaye indishyi ikwiye. Basabye urukiko rw’ubujurire kuzabarenganura.

Urubanza rukaba rwimuriwe tariki ya kane y'ukwezi gutaha.

Ifatwa n'ifungwa rya Rusesabagina ryateje impaka nyinshi haba mu Rwanda no hanze yarwo. Imiryango mpuzamahanga n'ibihugu bikomeje gusaba leta y'u Rwanda kumurekura kuko bisanga yarafashwe mu buryo butemewe n'amategeko. Mu muryango we bemeza ko yashimuswe.

Johnston Busingye ni umwe mu bashinjwa n'umuryango wa Rusesabagina ko yagize uruhare mu ishimutwa rya Paul Rusesabagina ubwo yemereraga umunyamakuru wa Televiziyo Al Jazeera ko leta y’u Rwanda ari yo yafashije kuzana Rusesabagina mu Rwanda. Icyo gihe yemeye ko leta y’u Rwanda ari yo yarishye indege yagejeje Rusesabagina I Kigali.

Amaze kuva ku mwanya wa ministiri w'ubutabera, Busingye yasabiwe guhagararira u Rwanda mu Bwongereza.

Amakuru Ijwi ry'Amerika rikesha ikinyamakuru the East Africa avuga ko Ubwongereza bwamaze kwemerera Busingye guhagararira u Rwanda muri icyo gihugu. Ni nyuma y’amezi agera kuri atandatu ahawe izi nshingano ariko akaba atarahise yemererwa kuzinjiramo.

Byakunze kuvugwa ko bimwe mu byadindije kwemerwa kwa Busingye, ari ibirego byamushinjaga kugira uruhare mu guhonyora uburenganzira bwa muntu, cyane ku kibazo cy’igarurwa rya Paul Rusesabagina mu Rwanda .

Umuryango wa Rusesabagina, imiryango imwe iharanira uburenganzira bwa muntu, bamwe mu bagize inteko ishingamategeko y'Amerika n'inteko ishingamategeko y'Ubumwe bw'Uburayi bavuze ko ijyanwa rya Rusesabagina mu Rwanda rinyuranyije n'amategeko mpuzamahanga, basaba ko ahita arekurwa.

Businge yemerewe guhagararira u Rwanda mu gihugu cy’u bwongereza, ni impuguke mu by’amategeko, yakoze imirimo inyuranye mu rwego rw’ubutabera mu Rwanda, yayoboye urukiko rukuru, aba ministiri w’ubutabera igihe cy’ingana n’imyaka umunani.

Busingye yemerewe guhagararira u Rwanda mu Bwongereza, mu gihe hasigaye amezi agera kuri atatu ngo u Rwanda rwakire inama y'abakuru b'ibihugu na za guverinema bikoresha icyongereza byinshi byakolonijwe n'Ubwongereza.

Ni inama yari imaze gusubikwa kabili kubera icyorezo cya Covid-19.

Facebook Forum

XS
SM
MD
LG