Russia Today, RT mu magambo magufi, ni televiziyo mpuzamahanga ya leta y'Uburusiya. Urwego rugenzura imikorere y'itangazamakuru mu Bwongereza, Ofcom, rwafashe iki cyemezo rusobanura ko rwakoze anketi zirambuye rusanga RT itangaza amakuru abogamye ku ntambara y'Uburusiya muri Ukraine.
Mu 2019, Ofcom nabwo yari iherutse guca RT ihazabu y'ama-pounds 200,000 (ni ukuvuga amadolari arenga 260,000) na none kubera kubogama.
Guhagarika RT gukorera mu Bwongereza ni nk'umuhango kuko yari imaze iminsi n'ubundi itagikora kubera ibihano ibihugu by'Ubulayi byafatiye Uburusiya bumaze gutera Ukraine. Mu rwego rw'ibi bihano, muri iki cyumweru guverinoma y'Ubwongereza yafatiriye imitungo y'umwanditsi mukuru wa RT, Margarita Simonyan, imuhanisha n'uko adashobora gukandagira ku butaka bw'Ubwongereza.
Dmitry Peskov, umuvugizi wa perezida w'Uburusiya, yamaganiye kure icyemezo cy'Ubwongereza. Avuga ko "ari ukuniga ubwisanzure bwo kuvuga icyo ushaka."
Nyamara rero, Uburusiya bwahagaritse imbuga nkoranyambaga z'ibitangazamakuru by'amahanga, birimo urubuga rwa internet rwa BBC y'Ubwongereza. Bwashyizeho n'amategeko mashya ahana cyane ibitangazamakuru n'abanyamakuru batavuga ibyo bushaka ku ntambara bwagabye kuri Ukraine.
Facebook Forum