Perezida Joe Biden yafashe icyemezo cyo kurekura imari ya Afuganistani yafatiriwe na Leta zunze ubumwe z'Amerika.
Afuganistani ifite umutungo wayo bwite uruta amadolari miliyari icyenda wafatiriwe n'amahanga Abatalibani bamaze kugaruka ku butegetsi mu kwezi kwa munani gushize.
Miliyari zirindwi ziri mu mabanki n'ibigo by'imari bitandukanye muri Leta zunze ubumwe z'Amerika. Andi afungiye, ahanini, mu Budage, mu Busuwisi no muri Emira z'Abarabu zunze ubumwe.
Perezida Biden yemeje ko kimwe cya kabiri, ni ukuvuga amadolari miliyari eshatu n'igice, agomba gusubira muri banki nkuru y'Afuganistani, kugirango agoboke abaturage bugarijwe n'ubukene buteye isoni nk'uko ONU n'imiryango y'ubutabazi babivuga.
Andi miliyari eshatu n'igice asigaye agomba kuguma muri Leta zunze ubumwe z'Amerika kubera inkurikizi z'ibitero by'iterabwoba byo ku itariki ya 11 y'ukwa cyenda 2011 ziri mu nkiko muri Amerika.
Koko rero, imwe mu miryango y'abazize ibi bitero baregeye impozamarira. Bavuga ko Afuganistani ari yo igomba kuzishyura kuko yari icumbikiye umukuru wa al-Qaida, Osama bin Laden, yabigabye.
VOA/AP/Reuters
Facebook Forum