Muri Afrika y'Epfo, Ebrahim Ismail Ebrahim, wafatanyije na Nelson Mandela kurwanya apartheid, yitabye Imana. Ebrahim Ismail Ebrahim yavutse mu 1937. Akomoka mu baturage b'Afrika y'Epfo b'Abahinde. Hamwe na ba Mandela, yataye ibikorwa byo kurwanya apartheid mu buryo bw'amahoro, ahitamo inzira y'intwaro mu mutwe w'inyeshyamba z'ishyaka ANC - Umkhonto we Sizwe, washinzwe na Nelson Mandela.
Yatawe muri yombi mu 1963, afungirwa muri gereza imwe na ba Mandela ku cyirwa cya Robben Island, mu nkengero z'umujyi wa Johannesburg. Yafunguwe mu 1979. ANC yahise imutegeka kuyisanga mu buhungiro mu 1980.
Mu 1989, intasi za leta y'apartheid zashimutiye Ebrahim Ismail Ebrahim aho yari atuye mu gihugu cya Swaziland, bamusubiza muri Afrika y'Epfo, akorerwa iyicarubozo, akatirwa igifungo cy'imyaka 20, na none muri gereza ya Robben Island. Yafunguwe mu 1991, amaze imyaka ibiri afunze, urukiko rw'ubujurire rumaze kuvuga ko urubanza rwe rudafite ishingiro kubera ko yari yarashimuswe.
Usibye gufatanya kwigira muri gereza na Nelson Mandela, yasangiye kasho ya Roben Island n'undi waje kuba perezida w'Afrika y'Epfo, Jacob Zuma.
Mu matora ya mbere yo mu 1994, Ebrahim Ismail Ebrahim yabaye depite wa ANC mu nteko ishinga amategeko. Guhera mu 2009, yabaye minisitiri wungirije w'ububanyi n'amahanga imyaka itandatu.
Yitabye Imana ari iwe mu rugo i Johannesburg. Yari amaze igihe kirekire arwaye, nk'uko ANC yabitangaje. Yari afite imyaka 84 y'amavuko.
Facebook Forum