Kameruni na Nijeriya bari mu mishyikirano yo gucyura abarwanyi b'umutwe wa Boko Haram bashyize intwaro hasi.
Nyuma y'iyicwa ry'umuyobozi wa Boko Haram, Abubakar Shekau, mu kwezi kwa gatanu gushize, abarwanyi ibihumbi n'ibihumbi ba Boko Haram bahungiye muri Kameruni, batanga intwaro zabo. Abarenga igihumbi muri bo bateraniye mu kigo cy'ahitwa Meri, hafi y'umupaka wa Kameruni na Nijeriya. Abenshi muri bo bakomoka muri leta ya Borno yo mu majyaruguru ya Nijeriya.
Uyu munsi, Umar Usman Kadafur, guverineri wungirije wa Borno, yabasuye. Yari aherekejwe n'abantu 14 bo mu nteko ishinga amategeko ya Nijeriya, abanyamategeko, n'abayobozi b'imiryango iharanira uburenganzira bwa muntu. Basabye aba bari abarwanyi ba Boko Haram gutahuka ku bushake bwabo.
Kameruni na Nijeriya bari barakoze inama y'umutekano mu kwezi kwa munani gushize mu murwa mukuru wa Nijeriya, Abuja, bumvikana ko bagomba korohereza abari abarwanyi ba Boko Haram bashaka gusubira iwabo.
Usibye abakomoka muri Nijeriya, Kameruni icumbikiye n'abavuka Cadi na Kameruni ubwayo.
Facebook Forum