Urukiko mpanabyaha mpuzamahanga CPI rwafashe icyemezo cyo kuburizamo impapuro zo guta muri yombi Simone Gbagbo, umugore w'uwahoze ari umukuru w'igihugu cya Côte d'Ivoire, Laurent Gbagbo.
CPI yashakishaga Simone Gbagbo kuva mu 2012 ku byaha byibasiye inyokomuntu n'ibyaha by'intambara. Ni kimwe neza n'ibyo umugabo we Laurent Gbagbo yaburanye, aratsinda.
Laurent Gbagbo amaze guhanagurwaho ibyaha, abashinjacyaha basabye abacamanza gusesa impapuro zo gushakisha Simone Gbagbo. Abacamanza rero bakurikiye abashinjacyaha, bavuga ko "izi mpapuro koko zitagifite ishingiro."
Mu 2017, ubucamanza bwa Côte d'Ivoire nabwo bwari bwagize umwere Simone Gbagbo ku byaha by'intambara n'ibyaha byibasiye inyokomuntu. Ariko mu 2015, bwari bwamuhamije ibyaha byo guhungabanya umutekano wa leta, bumukatira igifungo cy'imyaka 20. Yafunguwe mu 2018, amaze imyaka irindwi muri gereza, ku mbabazi z'umukuru w'igihugu, Alassane Ouattara.
Ibyaha byose ba Gbagbo bari bakurikiranweho ni ibyo mu ntambara yo mu 2010/2011, yakurikiye amatora ya perezida wa Côte d'Ivoire. Laurent Gbagbo yari yanze kwemera ko yayatsinzwe. Iyi ntambara yahitanye abantu barenga 3,000.
Facebook Forum