Uko wahagera

Afurika y'Epfo Yohereje Ingabo muri KwaZulu-Natal na Gauteng


Ubushyamirane muri Afurika y'Epfo

Muri Afrika y'Epfo, guverinoma iratangaza ko yatangiye kohereza abasilikali 25,000 kugarura ituze n'umutekano mu bice bimaze iminsi biyogozwa n'imvururu.

Nk'uko ibigo ntaramakuru bitandukanye bibitangaza, amakamyo, ibimodoka binini bitamenwa n'amasasu, na za kajugujugu byinshi birimo birageza abasilikali mu mijyi imaze icyumweru mu bwicanyi, gutwika no gusahura, mu ntara za Gauteng na KwaZulu-Natal. Bivuga ko byibura abasilikali 5,000 barangije gufata ibirindiro. Rugikubita, leta yabanje kwohereje abasilikali ibihumbi 2,500 mu mihanda gutera inkunga polisi bimaze kuyirenga.

Minisitiri w'ingabo, umutegarugoli Nosiviwe Mapisa-Nqakula, yatangaje ko abasilikali bose hamwe bagomba gutabara ari 25,000. Igisilikali cyabwiye kandi n'inkeragutabara zacyo zose 12,000 kwitegura. Ni ubwa mbere guverinoma y'Afrika y'Epfo ikoresheje abasilikali benshi gutya imbere mu gihugu nyuma y'ingoma y'apartheid n'Abazungu, yahirimye mu 1994.

myivumbagatanyo yatewe n'ifungwa ry'uwari umukuru w'igihugu Jacob Zuma, ukomoka mu ntara ya KwaZulu-Natal, yiganjemo abo mu bwoko bw'Abazulu. Zuma yakatiwe gereza y'umwaka n'amezi atatu kubera gusuzugura kwitaba urukiko. Ategereje ko urukiko rw'ubujurire yaregeye rubifataho icyemezo.

Imvururu zahitanye abantu 72, bazwi kugeza ubu. Naho abandi 1,350 batawe muri yombi. (VOA/AP/Reuters)

Facebook Forum

XS
SM
MD
LG