Uko wahagera

Covid-19: Misiri Izakora Urukingo Sinovac


Misiri izatangira gukora urukingo Sinovac rwa COVID-19 hagati muri uku kwezi kwa gatandatu.

Iki gihugu cyakiriye inkingo 500,000 Sinovac z’Ubushinwa uyu munsi kuwa mbere nk’uko amakuru yaturutse ku kibuga cy’indege abihamya. Ni mu gihe Minisitiri w’ubuzima wa Misiri yavuze ko urwo rukingo ruzatangira gukorerwa mu gihugu mu matariki yo hagati y’uku kwezi kwa gatandatu.

Mu kwezi gushize kwa gatanu, Misiri yakiriye ibyo izifashisha mu gukora miliyoni ebyiri z’urukingo Sinovac, nyuma yo gusinya amasezerano yo kurukorera imbere mu gihugu no kurutanga mu bindi bihugu byo muri Afurika.

Inkingo za mbere byitezwe ko zizakorwa kw’italiki 15 y’uku kwezi kwa gatandatu. Hazakenerwa ibyumweru bigera kuri bitandatu rusuzumwa, mbere yo kurushyira mu bigo ngo birutange. Ibyo Minisitiri Hala Zayed yabibwiye televiziyo yigenga MBC Masr mw’ijoro ry’ejo ku cyumweru.

Misiri yiteze ibindi izifashisha mu gukora inkingo miliyoni 4 n’ibihumbi 200 muri uku kwezi. Zayed yavuze ko intego ari ugukora miliyoni 40 z’inkingo muri uku kwezi.

Guverinoma ya Misiri yiteze gusinya amasezerano mu bihe bya vuba n’isosiyeti mpuzamahanga yo gukorera mu Misiri urukingo rwo mu Bulayi. Na byo byavuzwe na Minisitiri Zayed, ariko yirinda kugira ibisobanuro birambuye atanga. Inama y’abaminisitiri yari yavuze mbere ko Misiri ishaka gukorera urukingo rwa AstraZeneca imbere mu gihugu.

Iki gihugu cya Misiri cyakiriye miliyoni nyinshi z’inkingo z’AstraZeneca n’iza Sinopharm, cyavuze ko gifite intego yo gukingira 40 kw’ijana by’abaturage bacyo barengaho gato miliyoni 100, mbere y’impera z’uyu mwaka wa 2021.

Facebook Forum

XS
SM
MD
LG