Muri gahunda yo kubafasha kwitegura neza gukurikira irushanwa rya Basketball Africa League rizabera mu Rwanda guhera kuri iki cyumweru, dukomeje guterera akajisho ku makipe asazeruka. Muri aka kanya tugiye kuvuga ku makipe atatu agomba kwesurana n’ikipe ya Patriotes Basketball League mu majonjora yo mu itsinda rya mbere. Ayo ni US Monastir yo muri Tuniziya, Rivers Hoopers yo muri Nigeriya na Gendarmerie Nationale yo muri Madagascari.
Ikipe ya Union Sportive de Monastir yo muri Tuniziya yavutse mu mwaka wa 1959 ikaba imaze gutwara ibikombe 6 bya shampiyona y’igihugu. Yitoreza mu nzu y’imikino yitiriwe Mohamedi Mzali ari na ho yakiririra imikino yayo, ibaka ifite ubushobozi bwo kujyamo abantu 4000. US Monastir yambara imyenda y’umweru iyo irimo gukinira mu rugo, yaba yasuye ikambara ry’ikijuju na ho ibara ryayo rya gatatu ni ubururu ku makabutura n’amasengeri y’ubururu n’umweru. Muri iri rushanwa rya BAL rigiye kubera mu Rwanda, US Monastir yamanukanye intwaro zayo zikomeye ziganjemo abasore b’Abanyatuniziya. Abakinnyi b’abanyamahanga bitabajwe ni babiri gusa, ari bo Wael Arakji w’umunyalibani na mugenzi we Ater Majok ufite ubwenegihugu butatu, ubwa Libani, ubwa Australia n’ubwa Sudani ari na ho yavukiye. Uyu Ater Mayok, ku myaka ye 33, ni umusore wa Hambavu upima metero 2 na santimetero 8 akagira ibiro 106.
Dukomereje muri Rivers Hoopers yo muri Nijeriya, iyi kipe yashinzwe mu mwaka wa 2009 ikaba ibarizwa mu mugi wa Port Harcourt umurwa mukuru wa Leta ya Rivers. Mu kabati kayo harimo ibikombe 3 bya shampiyona. Ikibuga iyi kipe ikiniraho giherereye mu nyubako mberabyose ya Rivers State yakira abantu 2000. Iyi kipe ya Rivers Hoopers yambara imyenda y’amabara y’ubururu n’umweru. Mu rwego rwo kwitegura guhatana mu iri rushanwa rya BAL rigiye gutangira, Rivers Hoopers yarushijeho kwiyubaka, izana umutoza mushya Ogoh Odaudu usanzwe ari umutoza wungirije mu ikipe y’igihugu ya Nijeriya. Iyi kipe kandi imaze gusinyisha abakinnyi b’abanyamahanga 3 ari bo Robinson Opong w’Umunyauganda, n’Abanyamerika babiri ari bo Chris Daniels na Taren Sullivan.
Iyi kipe ya Rivers Hoopers kandi, ni yo izabanza gucakirana na Patriotes yo mu Rwanda mu mukino w’imbanzakwasa uzabimburira iyindi muri uru rugamba rwa BAL, mu nyubako y’imikino ya Kigali Arena i Remera kuri iki cyumweru guhera i saa kumi ku isaha y’i Kigali.
Dusoreze ku ikipe ya Gendarmerie Nationale Basketball Club yo muri Madagascar. Iyi kipe yambara imyenda y’umweru iyo yakiriye igakoresha iy’ubururu mu gihe yakiniye hanze. Yavutse mu mwaka wa 2012 kandi imaze gutwara igikombe cya shampiyona inshuro ebyiri. Gendarmerie Nationale ibarizwa ahitwa Antsirabe mu mugi wa Antananarivo umurwa mukuru wa Madagascar. Mu mikino yayo, iyi kipe yambara ubururu n’umweru ikoresha ikibuga giherereye mu nyubako ya Palais des Sport Mahamasina yakira abantu 7000.
Iyi kipe ntabwo yigeze yitabaza abakinnyi b’abanyamahanga uretse umusore umwe rukumbi w’umunyamerika witwa Ridley Cameron wakinaga mu kiciro cya kabiri mu Buyapani. Gendarmerie Nationale ifatwa nk’insina ngufi muri mu itsinda ryayo rya mbere, cyane cyane ko Patriotes yo mu Rwanda yayitsinze mu mukino usoza amajonjora ya nyuma yo gushaka itike yo gukina ikiciro cya nyuma cya BAL. Gusa, birashoboka ko amazi atakiri ya yandi kuko nyuma y’imyaka ibiri ibyo bibaye haba harahindutse byinshi. Amakuru yo mu mbere atariho ivumbi twashoboye kumenya ni uko umutoza wa Gendarmerie Nationale Lova Navalona Raharidera ari inzobere mu mayeri y’umukino, ibanga rye rikaba ari ryo gufasha abakinnyi bo mu gihugu imbere kumenyerana hagati yabo bitabaye ngombwa kwiyambaza intwaro ziturutse i Kantarange.
Muri iyi gahunda, tuzakomereza ku makipe yo mu itsinda rya kabiri, tubizeza ko twiyemeje kubagerera ku isoko nyirizina y’amakuru, mu ibanga ryhariye ryayobeye benshi, rituma tugera kugera ku makuru bwa mbere tukabimburira abasigaye bose. Uyu muvuno wa radiyo yanyu Mudatenguha, ni wo tuzakomeza kwifashisha kugira ngo tubabere aho mudashobora kwigerera muri iri rishanwa rya BAL, guhera muri iki gihe cy’umusogongero no mu gihe nyirizina cy’imikino kuva ku ntangiriro kugera ku ndunduro.
Facebook Forum