Uko wahagera

Imyigaragambyo Yamagana Ingamba za Covid-19 mu Burayi


Abigaragambya batawe muri yombi na polisi i Berlin mu Budage

Abantu ibihumbi n'ibihumbi bigabije imihanda i Berlin, umurwa mukuru w'Ubudage. Bazinduwe no kurwanya umushinga w'itegeko ryagombaga kwemezwa n'inteko ishinga amategeko uyu munsi, riha minisitiri w'intebe Angela Merkel ububasha busesuye bwo gushyira mu bikorwa ingamba zo gukumira Covid-19.

Muri izi ngamba harimo kubuza gukora ibirori, gufunga amaduka, guhagarika imikino na siporo, kunywa inzoga zisindisha mu ruhame, no kwambara agafungamunwa kw'itegeko. Amwe mu mashyaka atavuga rumwe na guverinoma asanga iri tegeko rigamije gushyiraho ubutegetsi bw'igitugu.

Polisi yari yagose inteko ishinga amategeko n'inyubakwa za guverinoma. Yakoresheje impombo z'amazi afite ingufu, iyabamishaho kugirango yigizeyo abashakaga kuhakorera imyigaragambyo yabo.

Muri iyi minsi, virusi ya Corona yariyongereye cyane mu Budage, Abantu bose yanduje bararenga ibihumbi 833. Naho abo imaze guhitana bararenga ibihumbi 13.

Mu Bufaransa naho, iragenda ikaze umurego. Mu ngamba leta yafashe, harimo guhagarika misa mu makiliziya gatulika. Byatumye abagatulika bakora imyigarambyo.

Nk'uko umushumba wa diyosezi ya Nanterre, hafi ya Paris, Musenyeri Matthieu Rougé, yabibwiye umunyamakuru w'Ijwi ry'Amerika mu murwa mukuru w'Ubufaransa, Nicolas Pinault, guhagarika misa, cyane cyane izo ku cyumweru, ni "ukwibasira ikintu gitagatifu."

Mu myigaragambyo yabo, abatulika bahisemo kujya bapfukama mu mihanda bakisengera. Barasaba leta kwemera ko misa zisomwa uko bisanzwe. Misa ntizibujijwe 100%. Nko mu zo gusengera abitabye Imana, ntizigomba kurenza abantu 30. Naho iz'ubukwe ntizemerewe abantu barenze batandatu

Facebook Forum

XS
SM
MD
LG