Uko wahagera

Abasirikari Bazagenzura Umutekano mu Mujyi wa Yaounde


Urujya n'uruza rw'imodoka mu murwa mukuru wa Kameruni

Muri aya mezi abiri ashize, ibisasu byagiye biturika i Yaounde, Nta muntu byahitanye ariko byakomerekeje 22.

Guverineri w'intara ya Yaoundé, irimo umujyi wa Yaoundé nyine, Naseri Paul Bea, avuga ko abasirikari babungabunga umutekano bafite uburenganzira bwo gusaka igihe icyo ari cyo cyose aho baketse ko hari abagizi ba nabi. Abantu nabo, n'imodoka, bazajya basakwa aho binjirira hose n'aho basohokera hose muri Yaoundé. Abantu kandi babujijwe kugira ibikapu binini n'impago nini ahateranira rubanda rwinshi no mu nyubakwa za leta. Abaturage batangaza ko bariyeri z'abasilikali n'abapolisi ari nyinshi.

Kameruni yugarijwe n'ikibazo cy'abarwanira ubwigenge bw'igice cy'uburegerazuba bw'igihugu kivuga Icyongereza n'ikibazo cya Boko Haram, mu majyaruguru y'igihugu. Ariko si iyi mitwe leta yegekaho umutekano muke muri Yaoundé.

Ahubwo, nk'uko umunyamakuru w'Ijwi ry'Amerika mu murwa mukuru wa Kameruni, Moki Edwin Kindzeka, abitubwira, bamwe mu bategetsi bemeza ko amashyaka atavuga rumwe na leta ari yo ari inyuma y'ibyo bisasu, agamije guhungabanya igihugu n'ubutegetsi bwacyo. Aya mashyaka nayo arabihakana, akavuga ko ubutegetsi bushaka uburyo bwo kuyaniga.

Kameruni irateganya amatora y'umukuru w'igihugu mu 2025. Amashyaka y'inshuti z'irya Perezida Paul Biya, ryitwa Rassemblement Démocratique du Peuple Camerounais ( RDPC ), ashaka ko azongera kwiyamamaza. Afite imyaka 87, kandi ari ku butegetsi kuva mu 1982.

Facebook Forum

XS
SM
MD
LG