Uzayobora Amerika mu myaka ine iri imbere ntiyari yamenyekana, amajwi yavuye mu matora yo kuwa kabiri akomeje kubarurwa.
Kandida w'ishyaka ry'Abademokarate Joe Biden aragenda yegera intsinzi uko amajwi agenda atangazwa buhoro buhoro, by'umwihariko muri leta ya Georgia (mu majyepfo y'igihugu) n’iya Pennsylvania (mu majyaruguru y'uburasirazuba bwa Leta zunze ubumwe z'Amerika).
Muri leta ebyiri, Perezida Donald Trump, kandida w'ishyaka ry'Abarepubulikani, yabanje kuza imbere kuva kuwa kabiri nimugoroba. None Joe Biden aragenda amutambuka mu majwi. No muri rusange, Joe Biden aracyari imbere, ariko ntarageza ku majwi ya ngombwa kugirango abe perezida wa 46 wa Leta zunze ubumwe z'Amerika muri iyi myaka ine iri imbere.
Usibye muri leta za Georgia na Pennsylvania rugikomeye, ibarura ry'amajwi rikomeje mu gihugu hose, ariko mu zindi leta ebyiri Arizona (mu majyepfo) na Nevada (mu burengerazuba) uwazitsinze nataratangazwa.
Hagati aho, Perezida Trump arega Abademokarate ngo barimo baramwiba amajwi ku buryo bukabije. Ariko nta kimenyetso atanga. Abanyamategeko be batangiye gutanga ibirego mu nkiko, basaba ko ibarura ry'amajwi rihagarara cyangwa se risubirwamo muri leta zimwe na zimwe. Avuga ko yiteguye kuzamura imanza kugera no mu Rukiko rw'Ikirenga bibaye ngombwa. Naho Joe Biden arasaba rubanda kwihangana, bagategereza ko amajwi yose abarurwa.
Muri uyu mwaka, abaturage barenga miliyoni 150 ni bo batoye.
Facebook Forum