Nyuma y’uko ibikorwa byo guhatanira umwanya wa perezida birangiye ejo kuwa kabiri miliyoni z’Abanyamerika bazindukiye ku biro by’amatora mu gihugu hose, gufata icyemezo cyo kugumisha ku butegetsi, umurepuburika Donald Trump akaba yakomeza kuyobora indi myaka ine cyangwa kumusimbuza umudemokarate bahanganye wahoze ari visi perezida, Joe Biden.
Batoye Mbere ari Benshi
Kubera icyorezo cya virusi ya corona, abantu basaga miliyoni 99 batoye mbere y’itariki y’amatora. Aba barenga bibiri bya gatatu by’abantu miliyoni 139 batoye mu 2016 ubwo Trump yatsindaga umudemokarate Hillary Clinton ku buryo butunguranye. Muri uyu mwaka wa 2020 abatora bashobora kuzagera kuri miliyoni 150 cg bakarenga. Ni bwo bwa mbere mu mateka y’Amerika hazaba hatoye abantu benshi. Buri Leta ifite amategeko arebana n’igihe ntarengwa cyo kwakira ubutumwa bw’abatora bakoresheje iposita ariko abenshi bishobora kurangira mu ijoro ryo kuri uyu wa kabiri cg nyuma yaho gato kandi ibyavuye mu matora ntibihita bitangazwa.
Aya matora abaye nyuma yo kwiyamamaza kwaranzwe no kwibasirana kw’abakandida, buri wese avuga ko uwo bahanganye adashoboye ahubwo yaganisha igihugu aharindimuka. Mu mpera z’iki cyumweru gishize abashyigikiye Trump bibasiye abamamazaga Biden muri Leta ya Texas bavana mu muhanda bisi y’abamamazaga Biden ari na ko ikivunge cy’imodoka z’abamamaza Trump bagenda bamanitse amabendera amwamamaza.
Abategetsi n’abacuruzi mu migi imwe n’imwe nka New York na Washington, DC hafi ya perezidanse, bazitiye imbere y’amaduka mu rwego rwo gukumira abashobora gusahura no kugira ibyo bangiza mu gihe hakwaduka imvururu nyuma y’amatora.
Abenshi mu batoye mbere y’igihe bakoresheje iposita bangana na bibiri bya gatatu, bavuze ko birinze guhura n’abandi bantu ku munsi w’amatora kuko muri Amerika hamaze iminsi hagaragara abandura virusi ya corona bagera ku bihumbi 90.
Hagati aho bamwe mu bademokarate bavuga ko bashatse kuba mu bambere batoye badashyigikiye Trump bakamugira umuperezida wa gatatu unaniwe kwegukana manda ya kabiri. Abarepubulikani bo bavuga ko bashatse kwigira kuri site z’itora ku munsi nyirizina w’amatora, ku wa kabiri wa mbere ukurikira uwa mbere ubanza w’ukwezi kwa 11, nk’uko buri myaka 4 bikorwa mu mateka y’Amerika.
Abatora barahitamo 1 mu basaza b’imyaka ibarirwa muri 70, abagabo barusha imyaka benshi cyane mu banyamerika miliyoni 328. Ku munsi uzatsinda amatora azarahiraho, ku itariki 20 z’ukwezi kwa mbere k’umwaka utaha, Biden azaba yujuje imyaka 78 mu gihe Trump we afite 74. Uwatsinda amatora uwo ari we wese muri aba, azaba ari we muperezida uyoboye Amerika akuze kurusha abandi bose bayiyoboye. Abatora kandi baratora n’abadepite 435, abasenateri 35 mu 100 bagize sena.
Mu minsi ya nyuma yo kwiyamamaza kwabo, baribasiranye buri wese yemeza ko azatsinda mugenzi we. Trump abamushyigikiye bo muri Leta ya Pennsylvania ko Biden adakanganye ndetse ko kumukubita bitagombera gufunga igipfunsi.
Trump avuga ko Biden afite uburwayi ku buryo bwo kwangirika imitsi yo mu mutwe kandi ko arimo kwiyamamariza gusubira muri sena aho yamaze imyaka 36 ari umusenateri mbere y'uko aba visi perezida imyaka 8 yungirije Barack Obama.
Donald Trump
Mu minsi ya nyuma yo kwiyamamaza, perezida Trump yavuze ko amatora ari umwanya wo guhitamo ko inzozi z'Amerika zigerwaho cg ibibazo by'urusobe biterwa na politike ya gisosiyalisiti; amahitamo hagati ya Trump wazahuye ubukungu bw'igihugu n'agahinda Biden azabakururira.
Trump avuga ko Biden aramutse atowe, azakurikiza politiki z'abademokarate bifuza kujya ku butegetsi ngo bashyire mu bikorwa politike z'ubuzima n'iz'imihindagurikire y'ikirere nubwo Biden we avuga ko atari byo ashyize imbere. Trump ntiyahwemye kuvug ko igihugu cye cyitwaye neza cyane mu guhangana n'icyorezo cya virusi ya corona imaze kwica abanyamerika ibihumbi bisaga 231 n'abayanduye bakaba bagera kuri miliyoni 9 n'ibihumbi 200; kandi mu byumweru bike biri imbere urukingo ruzaba rwabonetse. Imibare itangazwa na kaminuza ya Johns Hopkins yerekana ko muri Amerika ari ho hamaze gupfa abantu benshi bazize virusi ya corona. Kuwa gatandatu, Trump yaravuze ati "ejo nakurikiye ijambo rya Biden, ntakindi avuga uretse corona. Ni corona avuga gusaaa, ntakindi.
Joe Biden
Biden yakunze kumvikana anenga uburyo ubutegetsi bwa Trump bwananiwe guhangana na virusi ya corona n'ukuntu Trump yavuze ko abantu bazajya bayivura bakoresheje amazi yifashishwa mu gusukura ibintu binyuranye. Hari aho Biden yabwiye abamushyigikiye ko amamiliyoni menshi y'abaturage batakaje akazi kubera virusi ya corona, ko nta cyizere cy'ejo hazaza kandi ko Trump yatereye agati mu ryinyo agatererana abaturage. Biden ati "twahisemo icyizere aaho kugira ubwoba, twahisemo ubumwe aho gucikamo ibice; duhitamo ubumenyi aho kugendera ku magambo gusa; kandi twahisemo ukuri twanga ikinyoma". Ubwo yari mu mugi wa Flint muri leta ya Michigan yaravuze ati "Sinitaye kuburyo Trump yaba agerageza bwose. Ntakintu na kimwe, reka mbishimangire ko nta kintu na kimwe cyabuza abaturage b'iki gihugu gutora ku bwinshi ngo twongere dusubirane demokarasi."
Koleji y'Abatora Perezida
Amakusanyabitekerezo ku bishobora kuva mu matora amaze iminsi yerekana ko Biden aza imbere ya Trump ho ibice 7 cg 8 ku ijana, ariko nanone mu maleta ahatanirwa cyane ari na yp ashobora guhesha umwe muri aba amahirwe ho amurusha nk'ibice hafi 4. Amerika ntigendera ku mahitamo ya rubanda ngo uwo bahundagajeho amajwi ku bwinshi abe ari we uba perezida. Kugira ngo umukandida atsindire kuyobora Amerika bimusaba kubona amajwi 270 muri 538 y'abagize koleji y'abatora. Muri leta 50 zigize Amerika, Trump cg Biden agomba gutorwa n'abaturage benshi kandi zimwe muri izi leta zikomeye zinahagarariwe n'abantu benshi muri koleji y'abatora. zimwe mu mbuga zikusanya ibitekerezo ku mukandida uhabwa amahirwe cyane zigaragaza ko Biden arusha Trump amahirwe. Ku rundi ruhande ariko imbuga zandika cyane kuri politiki zo zivuga ko Trump agifite amahirwe yo kuba yahabwa amajwi na koleji y'abatora nubwo abaturage baba batamutoye nk'uko byagenze mu 2016.
Hirengagijwe koleji y'abatora, umwarimu wigisha amateka muri kaminuza y'i Washington yitwa Amerikan University Allan Lchtman avuga ko Biden ari we abaturage bahitamo. Kuva mu 1984, Lichtman ukurikirana amateka y'abaperezida yagiye avuga umukandida uzatsinda amatora kandi koko akaba ari ko bigenda ndetse na Trump watsinze atunguranye Lichtman yari yarahanuye ko ari we uzayatsinda.
Isesengura rya Lichtman kuri iyi nshuro, ryerekana ko Trump yari afite amahirwe yo kongera gutorwa ariko ko kunanirwa guhangana na virusi ya corona bisa nk'ibyamugabanyirije amahirwe. Asanga Biden ari we uzatorwa arushije Trump amajwi make cyane. Abishingira ku kuba ubukungu bw'Amerika bukomeje gusubira inyuma, imyigaragambyo y'abaturage kuva mu kwezi kwa 5 ubwo umwirabura George Floyd yicirwaga muri kasho ari mu maboko y'abapolisi no kuba Trump adafite uburambe buhagije muri politike. Lichtman avuga ko harebwa uburyo umuperezida uri kubutegetsi yakoze, uko yayoboye ko uburyo abakandida biyamamaza atari byo byitabwaho.
Facebook Forum