Uko wahagera

Ibihumbi Bahunga Imirwano mu Ntara ya Helmand muri Afuganisitani


Bombe nyinshi ziteze ku mihanda zihitana abasivile

Muri Afuganistani, abantu ibihumbi n'ibihumbi barimo barahunga imirwano ikaze cyane hagati y'ingabo za leta n'inyeshyamba z'Abatalibani mu majyepfo y'igihugu.

Imirwano ikaze cyane imaze iminsi mu ntara ya Helmand, mu majyepfo y'Afuganistani. Nk'uko leta y'iki gihugu ibivuga, yatangiye Abatalibani bagabye ibitero bikomeye ku mujyi witwa Lashkar Gah. Byatumye indege z'intambara za Leta zunze ubumwe z'Amerika zijya kurasa urufaya kugirango zikubite ingabo mu bitugu abasilikali ba leta y'Afuganistani.

Imirwano imaze kwirukana mu byabo imiryango irenga ibihumbi bitanu. Ni ukuvuga byibura abantu ibihumbi 30, nk'uko Sayed Mohammad Ramin, umuyobozi w'ishami rishinzwe impunzi mu ntara ya Helmand yabitangaje.

Abaturage, bamwe n'utwangushye abandi nta kintu na kimwe babashije kwirukankana, bakoresha uburyo bwose bashoboye kugirango bahunge. Baragenda ku maguru, ku mapikipiki, mu matagisi no mu mabisi, buzuriranye. Amahema yo kubacumbikira ntahagije. Imiryango imwe n'imwe irara ku gasozi, mu mihanda.

Umuryango w'Abibumye uratakambira impande zombi kugirango zireke kwica abaturage b'inzirakarengane, no kubafungurira amayira kugirango babashe kwihungira.

Iyi mirwano ikaze ibaye mu gihe leta y'Afuganistani n'Abatalibani bari mu mishyikirano i Doha, umurwa mukuru w'igihugu cya Qatar kuva ku italiki ya 12 y'ukwezi gushize. Nk'uko ibigo ntaramakuru mpuzamahanga bitandukanye bibyemeza, imishyikirano isa n'itava aho iri. Impande zombi n'ubu zananiwe kumvikana kuri gahunda y'ibiganiro

Imirwano ibaye kandi Leta zunze ubumwe z'Amerika n'Abatalibani baragiranye amasezerano yo mu kwezi kwa kabili gushize i Doha, avuga ko Abatalibani bagomba kugabanya ibitero byabo no kwirinda kugaba ibitero ku mijyi. Ku rundi ruhande, amasezerano avuga ko Leta zunze ubumwe z'Amerika igomba gukura ingabo zayo zose n'iz'amahanga muri Afuganistani bitarenze ukwezi kwa gatanu k'umwaka utaha w'2021.

Facebook Forum

XS
SM
MD
LG