Uko wahagera

Uburusiya Bwirinze Ijambo ku Matora yo muri Amerika


Dmitry Peskov ni we muvugizi wa Perezida w'Uburusiya Vladimir Poutine

Uburusiya bwatangaje ko buzirinda gukora amangazo ku bikorwa byo kwiyamamaza mu matora yo muri Leta zunze ubumwe z'Amerika.

Umuvugizi wa Perezida Vladimir Poutine, Dmitry Peskov, yavuze uyu munsi mu kiganiro n'abanyamakuru cyakorewe kuri telefoni ko "Uburusiya, kimwe n'andi mahanga yose yo ku isi, ikurikiranira hafi cyane, iby'amatora yo muri Leta zunze ubumwe z'Amerika, kubera ko ari kimwe mu bihugu bya mbere biri ku isonga mu bukungu."

Yongeyeho, ati: "Ariko rero, ntidushaka gukora itangazo iryo ari ryo ryose kubera ko hari abashobora kubibonamo kwivanga mu matora y'Amerika. Uburusiya ntibwigeze, kandi ntibuzigera na rimwe, bwivanga mu bibazo bwite bya Leta zunze ubumwe z'Amerika."

Nyamara rero, inteko ishinga amategeko ya Leta zunze ubumwe z'Amerika yo iracyakora amaperereza ku buryo Uburusiya bwivanze mu matora ya Leta zunze ubumwe z'Amerika yo mu 2016. Bityo, uyu munsi, Komite ya Sena y'Amerika ishinwe kugenzura inzego z'ubucamanza yahamagaje James Comey, wahoze ari umuyobozi mukuru wa FBI, urwego rw'ubugenzacyaha rwa Leta zunze ubumwe z'Amerika.

Iyi Komite yiganjemo kandi iyobowe n'abo mu ishyaka ry'Abarepubulikani rya Perezida Trump. Irashaka ko James Comey yongera kuyisobanurira uko yitwaye muri anketi za FBI zarebaga niba Uburusiya bufasha Trump kwiyamamaza no gutsinda amatora yo mu 2016.

Facebook Forum

XS
SM
MD
LG