Bwa mbere na mbere mu myaka 19 bamaze barwana, leta y'Afuganistani n'Abataribani baraganira imbonankubone, amaso mu yandi, uyu munsi i Doha, umurwa mukuru w'igihugu cya Qatar.
Imishyikirano yatangiye kuwa gatandatu ushize, baganira n'abahuza bamwe ku ruhande rwabo, abandi nabo ku rundi ruhande. Umwami wa Qatar, Cheikh Tamim Ben Hamad al-Thani, nawe ubwe yabakiriye bamwe ukwabo, abandi ukwabo.
Icyihutirwa leta y'Afuganistani ishaka ni uguhagarika imirwano n'ingoga. Abataribani bo ntacyo bavuga kuri iyi ngingo. Ahubwo bashyira imbere gushinga ubutegetsi bukomeye bwa kisilamu muri Afuganistani, nk'uko umukuru w'intumwa zabo i Doha, Abdul Ghani Baradar, yabitangaje. Yaravuze, ati: "Ndashaka ko buri wese yita ku idini rya Isilamu mu mishyikirano no mu masezerano. Ntabwo Islam igomba kuba igitambo cy'inyungu z'abantu ku giti cyabo."
Mu ntumwa za leta y'Afuganistani harimo abategarugori. Ku rundi ruhande, nta muntu w'igitsina gore n'umwe uri mu ntumwa z'Abataribani. Igihe bari ku butegetsi muri Afuganistani, kuva mu 1995 kugera mu 2001, nta mwana w'umukobwa wari wemerewe kujya mu ishuli, nta burenganzira abagore bari bafite.
Iyi myaka 19 y'intambara yo muri Afghanistani yahitanye abantu ibihumbi n'ibihumbi, barimo abasilikali ba Leta zunze ubumwe z'Amerika ibihumbi bibiri na 400. Leta zunze ubumwe z'Amerika imaze kandi kuyitangamo amadolari arenga miliyari igihumbi, ni ukuvuga arenga tiriliyoni.
Facebook Forum