Perezida wa Guinea, Alpha Conde, aziyamamariza manda ya gatatu mu matora y'umukuru w'igihugu yo mu kwezi gutaha.
Ishyaka rya Perezida Conde, Rassemblement du peuple de Guinée (RPG), ryamugize kandida waryo mu kwezi gushize, ariko we ntiyahise avuga niba abyemeye cyangwa niba atabishaka. Uyu munsi, RPG yasomesheje itangazo kuri televiziyo ya leta, ivuga ko yabyemeye.
Alpha Conde yatowe bwa mbere mu 2010, arongera atorerwa manda ya kabiri, ari nayo yagombaga kuba iya nyuma, mu 2015. Mu mwaka ushize, yahinduye itegeko nshinga ku buryo bwateye imyivumbagatanyo yaguyemo abantu 30, akuramo ingingo yategekaga umubare wa manda ebyiri ntarengwa z'umukuru w'igihugu.
Usibye iyi ngingo yakuyemo n'indi yavugaga ko manda imwe ari imyaka itanu. Itegeko nshinga rishya rivuga noneho ko manda ari imyaka itandatu. Bivuze ko Perezida Alpha Conde w'imyaka 82 y'amavuko, ashobora kuguma ku butegetsi indi myaka 12 iri imbere.
Facebook Forum