Muri Leta zunze ubumwe z'Amerika, inama kaminuza y'ishyaka ry'Abademokarate iratangira uyu munsi. Izarangira kuwa kane yimitse ku mugaragaro Joe Biden nka kandida uzahagararira ishyaka ku myanya y'umukuru w'igihugu mu matora yo mu kwezi kwa 11 gutaha.
Ubusanzwe, inama kaminuza y'ishyaka yakoranyaga imbaga y'abantu ibihumbi n'ibihumbi. Iyi y'uyu mwaka yo iraba ku buryo budasanzwe bw'ikoranabuhanga ry'amashusho kubera icyorezo cya virusi ya Corona. Yihaye insanganyamatsiko ku bwiyunge. Mu itangazo yashyize ahagaragara, iravuga ngo "nk'uko twagiye tubibona mu mateka y'igihugu cyacu, iyo dushyize hamwe nta kitunanira, harimo n'ibibazo by'ingutu bitwugarije muri iki gihe."
Mu bagomba gufata ijambo, harimo Michelle na Barack Obama, perezida wa 44 wategetse Leta zunze ubumwe z'Amerika kuva mu 2009 kugera mu 2017. Icyo gihe, Joe Biden yari visi-perezida we.
Barimo kandi Hillary na Bill Clinton na we wabaye perezida wa 42 w’Amerika, Senateri Bernie Sanders, wiyamamaje mu matora y'amajonjora y'Abademokarate uyu mwaka no mu 2016, Nancy Pelosi uyobora Umutwe w'Abadepite w'inteko ishinga amategeko y'Amerika, na Chuck Schumer ukuriye Abademokarate mumutwe wa Sena y'igihugu.
Gahunda irateganya kandi umunyapolitiki John Kasich wo mu ishyaka ry'Abarepubulikani wabaye guverineri wa leta ya Ohio, mu majyaruguru y'uburasirazuba bwo hagati bwa Leta zunze ubumwe z'Amerika. Yigeze kandi kuba kandida ku mwanya w'umukuru w'igihugu mu majonjora yo mu ishyaka rye ariko ntiyabona amahirwe. Nk'uko Inama kaminuza y'Abademokarate ibisobanura mu itangazo ryayo, Kasich arateganya kuvuga impamvu ashyigikiye Joe Biden aho gushyigikira kandida w'Abarepubulikani Donald Trump.
Senateri Kamala Harris azavuga ijambo kuwa gatatu, yemera kwiyamamazanya na Joe Biden ku mwanya wa visi-perezida. Inama izasozwa kuwa kane n'ijambo rya Joe Biden, nawe uzemera ku mugaragaro guhagararira ishyaka ry'Abademokarate ku mwanya w'umukuru w'igihugu mu matora yo mu kwa 11.
Abarepubulikani nabo bazakoresha inama kaminuza yabo mu cyumweru gitaha.
Facebook Forum