Uko wahagera

Imyitozo ya Irani Yateye Ingabo z'Amerika Kuryamira Amajanja


Ku kibuga cy'indege za gisirikare cy'Amerika kiri Al-Dhafra, hafi y'ikigobe cya Hormuz

Ingabo za Irani zarashe ibisasu bya rutura mu gikorwa cy'umwitozo wa gisirikare watumye ingabo za Leta zunze ubumwe z'Amerika ziri ahitwa Al-Dhafra na Al-Udeid muri Leta zunze ubumwe z'Abarabu ziryamira amajanja.

Umwitozo wa gisirikare ingabo za Irani zakoze waranzwe no kurasa ibisasu bya rutura byo mu bwoko bwa missile byarasiwe mu kuzimu bitumbagira mu kirere cy'ikigobe cya Hormuz byerekeza ku ndege zagenewe kuraswa mu gihe cy'imyitozo. Televiziyo ya Leta yatangaje ko muri uwo mwitozo, hagaragayemo n'indege z'intambara zitagira abazitwaye zasukaga ibisasu ku ntego zagenwe. Amashusho y'indege zitagira abaderevu yerekanye ibindi bisasu byarasiwe mu butayu ku ntego zagenewe kwitoza.

Jenerali Amir Ali Hajizadeh, ukuriye ingabo za Irani zirwanira mu kirere, yabwiye televiziyo ya Leta ko ari ubwa mbere igisirikare gikora umwitozo nk'uwo, n’ubwo kizigamye ibisasu bya rutura mu bubiko bwacyo bw'intwaro. Uwo mwitozo wari ukaze ku buryo watumye ingabo z'Amerika mu bigo bibiri biri muri ako gace ziryamira amajanja.

Wafashwe nk'ugamije gutanga ubutumwa kuri Leta zunze ubumwe z'Amerika no kugaragaza ko hakiri kurebana nabi hagati ya Irani n'Amerika. Mu kwezi kwa mbere uyu mwaka, ibitero by'ingabo z'Amerika byahitanye Jeneral Quassem Soleimani wafatwaga nk'umucurabwenge n'umuyobozi ukomeye mu gisirikare cya Irani. Na yo yihimuye irasa ibisasu byakomerekeje abasirikare b’Amerika muri Iraki. Umwitozo ingabo za Irani zakoze uyu munsi n'uburyo ingabo z'Amerika zabyitwayemo biragaragaza ko ikibazo cy'intambara ishoboka hagati y'ibihugu byombi kitarakemuka.

Facebook Forum

XS
SM
MD
LG