Ubutabera bwa Irani bwatangaje ko bwahanishije igihano cy'urupfu umusemuzi washinjwaga kuba intasi y'Amerika no kugambanira Qassem Soleimani wahitanywe n'ibitero by'indege z'Amerika mu ntangiriro z'uyu mwaka.
Iyicwa rya Mahmoud Mousavi-Majd, watawe muri yombi mu mwaka wa 2018 ribaye mu gihe Abanya-Irani babarirwa muri za miliyoni bifashishije imbuga nkoranyambaga bamagana igihano cy'urupfu cyakatiwe abasore batatu bafatiwe mu myigaragambyo yo kurwanya ubutegetsi umwaka ushize.
Umwe mu banyamategeko babunganira yavuze ko icyo gihano cyabaye gisubitswe. Yavuze ko Amirhossein Moradi, Said Tamjidi, Mohammad Rajabi basanzwe ari incuti. Mu cyumweru gishize ijambo #Ntimubice ryanditse mu rurimi rw'igifarsi ryanyushijwe ku mbuga nkoranyambaga inshuro zibarirwa muri za miliyoni. Televiziyo y'igihugu yavuze ko urubanza rwabo ruzongera gusubirwamo.
Abaharanira uburenganzira bwa muntu baravuga ko itangwa ry'iki gihano rigamije gutera ubwoba rubanda ngo batinye gukora imyigaragambyo. Ibiro ntaramakuru bya Irani byatangaje ko polisi y'icyo gihugu yataye muri yombi abantu bari mu myigaragambyo mu mujyi wa Behbahan mu burengerazuba bushyira amajyepfo y'igihugu ariko umubare w'abafashwe cyangwa abo ari bo ntibyatangajwe.
Facebook Forum