Ntabwo turi imbeba zikorerwaho ubushakashatsi! Ni ko abantu bagera kuri 50 bavugaga kuri uyu wa gatatu mu myigaragambyo i Johannesburg, kuri kaminuza ya Witwatersrand, muri Afrika y'Epfo. Bamaganaga igeragezwa rw'urukingo rwa virusi ya Corona, Covid-19.
Afrika y'Epfo ni cyo gihugu cya mbere cyemeye iri gerageza ku mugabane w'Afrika, ku bufatanye bwa kaminuza Witwatersrand yo muri Afrika y'Epfo na Oxford yo mu Bwongereza. Igerageza ryatangiye mu cyumweru gishize. Rizakorwa ku bantu ibihumbi bibili babyiyemereye ku bushake bwabo, nk'uko kaminuza zombi zibyemeza.
Iyi myigaragambyo, n'ubwo yakozwe n'abantu bake, igaragaza ubwoba no kutabobana amakuru ahagije ku Banyafrika muri rusange, bumva ko babaye ibikoresho. Nyamara abakorwaho igeragezwa barabisobanuriwe bihagije. Ni ko Prof Shabir Madhi abisobanura. Prof Madhi ni mwalimu mu byerekeranye n'inkingo muri kaminuza wa Witwatersrand, akaba ari nawe ukuriye ibikorwa byose byo kugerageza urukingo rwa Covid-19 muri Afrika y'Epfo.
Afrika y'Epfo ni cyo gihugu gifite abantu benshi banduye virusi ya Corona ku mugabane w'Afrika. Abayirwaye, nk'uko leta ibitangaza, bararenga ibihumbi 150. Naho abo imaze kwica bararenga ibihumbi bibili na 600.
Facebook Forum