Muri Gabon, Sena yemeje ko kuryamana kw'abahuje igitsina bitazongera guhanwa n'amategeko. Umutwe w'Abadepite nawo wari wabyemeje mu cyumweru gishize. Hasigaye ko Perezida Ali Bongo ashyira umukono ku itegeko rishya kugirango ritangire gukurikizwa.
Ku butumwa yashyize ku rubuga rwe rwa Twitter, Perezida Bongo yaryishimiye. Ati: "Inteko ishinga amategeko ishubijeho uburenganzira bwa muntu bw'ibanze ku benegihugu bose: uburenganzira bwo gukunda, wisanzuye, udashobora kubihanirwa."
Itegeko ryacaga kuryamana kw'abahuje igitsina ryateganyaga igifungo cy'amezi atandatu n'ihadabu y'amadolari arenga ibihumbi umunani na 500.
Gabon ibaye igihugu cya cumi muri Afrika gikuye kuryamana kw'abahuje igitsina mu mategeko ahana ibyaha nyuma y'Afrika y'Epfo, Botswana, Angola, Mozambique, Seychelles, Côte d'Ivoire, Mali, Repubulika iharanira demokarasi ya Congo na Lesotho.
Ibihugu 28 by'Afrika yo munsi y'Ubutayu bwa Sahara biracyafite bene aya mategeko.
Facebook Forum