Kuwa gatatu, tariki ya 24 y'uku kwezi kwa gatandatu, umushinjacyaha mukuru w'urukiko mpuzamahanga mpanabyaha rudasanzwe rwashyiriweho Kosovo yatangaje ko yashyikirije abacamanza ikirego kuri perezida wa Kosovo, Hashim Thaci. Arashaka kumukurikiranaho ibyaha by'intambara n'ibyaha byibasiye inyokomuntu byo mu ntambara yo muri Kosovo mu myaka y'1998-99 na nyuma yaho.
URUKIKO
Urukiko mpuzamahanga rwashyiriweho Kosovo, igihugu kiri mu majyepfo y'uburasirazuba bw'Ubulayi, rwatangiye gukora mu 2015. Rugendera ku mategeko ya Kosovo. Rwashinzwe n'itegeko ryemejwe n'inteko ishinga amategeko ya Kosovo mu 2014. Ariko rugizwe n'abagenzacyaha, abashinjacyaha, umwanditsi w'urukiko, n'abacamanza mpuzamahanga. Umuryango w'ibihugu by'Ubulayi byiyunze (Union Européenne) ni wo uruha ingengo y'imali rukoresha.
Rushinzwe kuburanisha abantu bakekwaho ibyaha by'intambara n'ibyaha byibasiye inyokomuntu bo mu cyahoze ari umutwe w'inyeshyamba zarwaniraga ubwigenge bwa Kosovo (Armée de Libération du Kosovo, cyangwa UCK mu magambo ahinnye yo mu rulimi rwabo).
Iyi ntambara yabaye kuva mu kwezi kwa gatatu 1998 kugera mu kwa gatandatu 1999. Yahitanye abantu barenga ibihumbi 13, nk'uko imiryango mpuzamahanga itandukanye ibyemeza. Ariko urukiko rufite ububasha bwo gukurikirana ibyaha byabaye hagati y'italiki ya mbere y'ukwezi kwa mbere 1998 n'iya 31 y'ukwa 12 k'umwaka w'2000.
Urukiko ruri i La Haye mu Buholandi kubera umutekano w'abacamanza n'abandi bakozi barwo, ariko cyane cyane umutekano w'abatangabuhamya. Koko rero, abo rushinzwe gukurikirana ni bo bari ku butegetsi muri Kosovo. Umukuru muri bo ni Hashim Thaci
HASHIM THACI
Hashim Thaçi afite imyaka 52 y'amavuko. Ni we wari umuyobozi mukuru wa UCK. Kosovo imaze kubona ubwigenge, yabaye umutegetsi wa Kosovo mu myanya itandukanye, irimo minisitiri w'ububanyi n'amahanga, na minisitiri w'intebe. Yatorewe kuba perezida wa Kosovo mu 2016.
Umushinjacyaha mukuru w'urukiko amuregana n'abandi bantu icyenda, barimo Kadri Veseli wari ushinzwe iperereza muri UCK, nyuma waje kuba perezida w'inteko ishinga amategeko ya Kosovo. Bashinjwa ibyaha by'intambara n'ibyaha byibasiye inyokomuntu, birimo ubuhotozi, gushimuta abantu bakazimira, iyicarubozo, n'ibindi.
Umucamanza arimo arasuzuma ikirego, kugirango acyemeze burundu naramuka asanze giherekejwe n'ibimenyetso bifatika. Icyo gihe ni bwo umushinjacyaha azaba abonye uburenganzira bwo gusohora impapuro zo guta muri yombi abo arega.
Akimara kumenya ko yarezwe, Perezida Thaci yahise asubika urugendo yari agiyemo muri Leta zunze ubumwe z'Amerika. Umunyamakuru wa televiziyo yo muri Albania yitwa "Top Channel" baganiriye nawe ku kibuga cy'indege cya Tirana kuwa gatatu (taliki ya 24 y'ukwa gatandatu) yemeza ko Hashim Thaci yari agiye kurira indege ubwo yamenyaga inkuru y'ikirego kimuriho.
Abakuru b'ibihugu bashinjwe bakiri ku butegetsi.
Hachim Thaci abaye umukuru w'igihugu wa gatanu ushinjwe n'ubutabera mpuzamahanga ibyaha by'intambara n'ibyaha byibasiye inyokomuntu, ari ku butegetsi. Yabanjirijwe n'abandi bane: Milan Milutinovic, Slobodan Milosevic, Charles Taylor, na Omar el-Béchir.
Milan Milutinovic yari perezida wa Serbiya kuva mu 1997 kugera mu kwezi kwa 12 mu 2002. Yabaye umukuru w'igihugu wa mbere warezwe akiri ku butegetsi. Mu 1999, urukiko mpuzamahanga rwari rwarashyiriweho Yougoslaviya, TPIY, rwari i La Haye mu Buholandi. Rwamuregaga ibyaha by'intambara n'ibyaha byibasiye inyokomuntu byakorewe mu ntambara yo muri Kosovo mu 1998 n'1999. Mu kwezi kwa mbere 2003, we ubwe yishyize mu maboko y'urukiko. Yaburanye kuva mu 2006 kugera mu 2008. Umushinjacyaha yamusabiye igihano cyo gufungwa hagati y'imyaka 20 na burundu. Ariko urukiko rwasanze ari umwere, maze rumuhanaguraho ibyaha yaregwaga mu kwa kabili 2009, ruramurekura, aritahira. Ubu aba i Begrade, umurwa mukuru wa Serbia. Afite imyaka 77 n'igice y'amavuko.
Slobodan Milosevic yabaye umukuru w'igihugu wa kabiri washinjwe akiri ku butegetsi. Yabaye perezida wa Yougoslaviya kuva mu 1997 kugera mu 2000. TPIY yasohoye impapuro zo kumuta muri yombi mu 1999. Rwamuregaga ibyaha bya jenoside, ibyaha by'intambara n'ibyaha byibasiye inyokomuntu byabaye mu ntambara zo muri Bosniya, Kosovo, na Croasiya zabaye kuva mu 1991 kugera mu 1999. Mu kwezi kwa cyenda 2000, yatsinzwe amatora y'umukuru w'igihugu. Ubutegetsi bushya bwamushyikirije TPIY mu kwa gatandatu 2001. Yatangiye kuburana mu 2002, Yapfuye azize uburwayi mu kwa gatatu 2006 urubanza rutararangira, agifunze by'agateganyo muri gereza ya TPIY i La Haye.
Charles Taylor yabaye perezida wa Liberia kuva mu 1997 kugera mu kwa munani 2003. Urukiko mpuzamahanga rwari rwarashyiriweho Sierra-Leone rwasohoye impapuro zo kumuta muri yombi mu kwa gatatu 2003, aba abaye umukuru w'igihugu wa gatatu urezwe akiri ku butegetsi. Rwamuregaga ibyaha by'intambara n'ibyaha byibasiye inyokomuntu byo mu ntambara yabaye mu gihugu cy'abaturanyi cya Sierra-Leone kuva mu 1991 kugera mu 2001. Yari yarashyigikiye umwe mu mitwe y'inyeshyamba wakoze amabi ndengakamere muri iyi ntambara. Yafashwe mu 2006. Urubanza rwe, rwagombaga kubera muri Sierra-Leone, rwimuriwe i La Haye kubera impamvu z'umutekano. Urukiko rwamuhamije ibyaha yashinjwaga, rumukatira igifungo cy'imyaka 50. Ubu afungiye mu Bwongereza. Ni ho azarangiriza igihano cye.
Omar el-Béchir yategetse Sudani imyaka 30 kuva mu 1989 kugera mu 2019. Yabaye umukuru w'igihugu wa kane washyizweho impapuro zo kumuta muri yombi mu 2009 akiri ku butegetsi. Urukiko mpuzamahanga mpanabyaha, CPI, rumurega ibyaha bya jenoside, ibyaha by'intambara, n'ibyaha byibasiye inyokomuntu byakorewe muri Darfur, mu burengerazuba bwa Sudani. Yakuwe ku butegetsi ahiritswe na "coup d'Etat" ku italiki ya 11 y'ukwa kane 2019. Ubu afungiye i Khartoum. Leta ya Sudani ntiratangaza ku mugaragaro niba izamushyikiriza CPI.
Facebook Forum