Uko wahagera

Hafi Abantu Miliyoni 80 kw'Isi Baba mu Buhungiro


Aha ni mu nkambi y'abakuwe mu byabo n'imirwano muri Burkina Faso

Umuryago w'Abibumbye uratangaza ko abantu bavuye mu byabo ku gahato kubera impamvu zitandukanye barangana na 1% by'abatuye isi.

Mu cyegeranyo HCR yatangaje uyu munsi ivuga ko mu mpera z'umwaka ushize w'2019, abantu miliyoni 79 n'igice bari impunzi, abasaba ubuhungiro, n'abavuye mu byabo baba impunzi imbere mu bihugu byabo. Abari muri iki cyiciro cya nyuma ni bo benshi kubera ko bagera kuri miliyoni 46 n'ibihumbi 700.

Aba bantu bose bavuye mu byabo barangana na 1% cy'abantu bose batuye isi. HCR, iti: "Ni ubwa mbere mu mateka ibi bibaye." Kandi ikibazo gikomeye ni uko badafite icyizera cyo gusubira aho bakomoka kubera intambara, ubwicanyi, no kubuzwa amahwemo ku buryo butandukanye.

Ku muyobozi mukuru wa HCR, Filippo Grandi, umubare w'abantu birukanwa mu byabo wikubye kabiri mu myaka icumi gusa. Ati: "Bisobanuye ko intambara, ubwicanyi no guhohotera uburenganzira bwa muntu bigenda byiyongera ku isi."

Nk'uko HCR ibivuga, 68% by'aba bantu bose babaye impunzi hanze cyangwa imbere mu gihugu bakomokamo ni abo mu bihugu bitanu: Siriya (imaze imyaka icyenda mu ntambara), Venezuwela, Afuganistani, Sudani y'Epfo, na Myanmar (cyera yitwaga Birmaniya).

Facebook Forum

XS
SM
MD
LG