FIFA, ishyirahamwe ry'umupira w'amaguru ku isi, irazirikana imyaka 25 ishize ikipe ya Zambiya yose ipfiriye mu mpanuka y'indege.
Ku italiki ya 27 y'ukwezi kwa kane 1993, Chipolopolo (ni ko ikipe y'igihugu y'umipira w'amaguru ya Zambiya yitwa) yafashe indege y'ingabo z'igihugu i Lusaka yerekeje i Dakar muri Senegal mu rwego rw'amajonjora y'igikombe cy'isi cyo mu 1994 muri Leta zunze ubumwe z'Amerika.
Abakinnyi bari 18. Bari kumwe n'umutoza wabo Godfrey Chitalu n'abari bamwungirije babiri, muganga wabo, perezida w'ishyirahamwe ry'umupira w'amaguru rya Zambiya, umukozi mukuru wo muri minisiteri y'imikino, n'umunyamakuru umwe. Abaderevu bari batanu: aba Lietenant-Colonel babiri, Adjudant umwe na Caporal umwe, bari bakuriwe na Colonel Fenton Mhone.
Bahagaze gato i Libreville muri Gabon bongera kunywesha indege. Hashize akanya gato bahagurutse, indege yabo yagize impanuka, igwa mu nyanja y'Atlantika, muri metero 500 gusa uvuye ku nkombe. Bose uko bari 30 nta n'umwe warokotse.
Kwibuka ibi byago, nyuma y'imyaka 25, FIFA iravuga ko Zambiya yapfushije "abasore badasanzwe," urubyiruko rwa "zahabu" mu mupira w'amaguru. FIFA iributsa ko Zambiya yari imaze igihe kirekire itagaragara mu makipe akomeye, mbese isa n'itazwi. Ariko mu majonjora yari irimo, yari irangije icyiciro cya mbere ari iya mbere mu itsinda ryayo, ryarimo Madagascar, Namibiya, na Tanzaniya. Mu itsinda ryo mu cyiciro cya kabiri, Zambiya yari kumwe na Senegal na Maroc. Yari igiye gukina umukino wayo wa mbere muri iri tsinda.
Icyamamare rutahizamu Kalusha Bwalya, bahaye izina rya Great Kalu, yabwiye FIFA.COM, ati: "Sinabona amagambo yasobanura neza uko twumvise tumeze. N'ubu turacyarira." We n'undi mugenzi we, nawe w'icyamamare mu bo hagati Charles Musonda, barokotse ku bw'amahirwe. Amakipe bakiniraga mu Bulayi, PSV Eindhoven yo mu Buholandi kuri Bwalya na Anderlect yo mu Bubiligi kuri Musonda, yari yabatindije gato kubera imikino ayo makipe yari afite. Bagombaga kugenda irangiye bagahita basanga Chipolopolo i Dakar.
Ikipe yose imaze gupfa, isi yose yari yiteze ko Zambiya iva mu majonjora y'igikombe cy'isi. Nyamara Kalusha Bwalya, wari kapiteni wa Chipolopolo, yafashe icyemezo, yemeza leta ya Zambiya n'ishyirahamwe ry'umupira w'amaguru rya Zambiya guhita bakorakoranya indi kipe y'igihugu vuba vuba ako kanya. Byarabaye, maze mu mikino yayo ine yo mu cyiciro cya kabiri cy'amajonjora yakinnye na Senegal na Maroc irangiza ari iya kabiri n'amanota atanu kuri atandatu, ikurikira Maroc yagiye mu gikombe cy'isi muri iri tsinda.
Amezi abiri mbere y'imikino y'iki gikombe cy'isi yabaye muri Leta zunze ubumwe z'Amerika guhera ku italiki ya 17 y'ukwa gatandatu kugera kuri 17 y'ukwa kalindwi 1994, Zambyia ya Kalusha Bwalya na none yerekanye ubutwari bw'agatangaza mu gikombe cy'Afrika cy'ibihugu muri Tunisiya. Mu mukino wa nyuma ku italiki ya 10 y'ukwa kane 1994, Chipolopolo yahanganye n'ibihangange bya Nijeriya nka Sunday Oliseh, Jay Jay Okocha, George Finidi, Emmanuel Amunike, Daniel Amokachi, Victor Ikpeba na Rashidi Yekini.
Zambiya yaratsinzwe bibiri kuri kimwe ariko yari yabonye igitego cya mbere cya Elijah Litana ku munota wa gatatu umukino ugitangira. Nijeriya yatwaye igikombe. Nyamara Zambiya, itarahabwaga amahirwe na make, yavuye mu Tunisiya ari yo "ntwari y'Afrika" umwaka umwe gusa nyuma y'impanuka y'indege yatsembye ikipe yose ya mbere ku italiki ya 27 y'ukwa kane 1993 mu nyanja y'Atlantika ku nkengero za Libreville muri Gabon.
Hashize imyaka cumi n'umunani Chipolopolo ibaye iya kabiri mu gikombe cy'Afrika cy'ibihugu muri Tunisiya noneho yaragitwaye mu 2012 aho nyine yari yaragiriye ibyago i Libreville. Abakinnyi bagituye bagenzi babo baguye muri iriya mpanuka
Facebook Forum